大市咁旺，唔少靜咗好耐嘅炒家都出嚟玩番兩手，而好多未玩過股票的新手，亦被吸引落場，港股真係非常熱鬧。
經紀陳話，近期可留意有中資背景的二三線股，特別係有資產重組呢個概念，例如銀建（171）股權大變動，借資產重組概念大炒，股價急升，吸引咗唔少股民捧場，聽講好多捧場客都有錢賺。
另一隻值得留意的資產重組概念股，就係在前年年尾至去年年頭，幕後曾經打大交的中國物流，最後股權易手，改名中國誠通（217）。自從新大股東入主後，隻股除咗變賣資產還債外，基本上冇乜大動作，但踏入04年，隻股突然異動，市場傳出大股東搞資產重組。
事實上，人哋唔會無端端買隻殼返嚟，如果唔係想做嘢，買隻殼嚟做乜？
誠通上周五再度發難，急升26%，收0.31元，成交股數增加至4385萬股，金額1313.6萬元，睇成交唔似係乾炒，但亦唔似係大陸客所為，因為有大陸炒家落場，成交應該唔只咁少。
慕容小初