旅遊事務署同維港沿岸十八幢物業業主，串連搞嘅多媒體燈光音樂滙演「幻彩詠香江」，將會喺今個禮拜六上演，每晚重會喺十幢大廈嘅頂層加插煙火效果㖭。
長江實業總部中環長江集團中心，係其中一幢參加滙演嘅商廈，聽講重係唯一一幢，可以同時喺四面幕牆做出面積最大嘅燈光效果。長實喺收到旅遊事務署嘅原創音樂同滙演大綱，就交由專責部門，用兩個禮拜設計咗四百三十幅繪圖，再用電腦程式輸入大廈嘅光纖系統中，串連成動畫。
大廈總共有十五款圖案，好似有西方特色嘅風車同飄雪效果等，其他有摩天輪設計、寓意新年勝舊年嘅步步高陞，絲帶圍繞大廈變成禮物嘅圖案。
另外，長江集團中心「獨演」部份嘅圖案，就選用咗一條中國傳統嘅金龍，代表尊貴、成功同生命力。長實主席李嘉誠生肖屬龍，唔知同呢個選擇有冇關呢？
唔夠一個月就係猴年，風水師話本港地運由七運轉入八運，西南方會食正地運，蘭西聽九龍倉講，佢哋嘅深井碧堤半島，有唔少買家最近去擎天半島同佢哋傾偈，話個盤好風水，喺股票市場賺到笑，甚至成層樓賺咗返嚟咁滯。九倉喺賣碧堤時，樓市氣氛唔係咁好，但銷售成績唔錯，睇嚟唔使步入八運，九倉已經食到地運嘞。
噚日有批灣仔利東街居民走去天后嘅中原地產分行抗議，指中記發放錯誤訊息喎！蘭西問番主角高級經理黃良昇，佢話上個禮拜就市建局收購利東街嘅出價畀意見，一時搞錯用咗實用率八成嚟計，變成每方呎建築面積賠五千蚊，但部份業主就話實情係每呎收得三千幾蚊。言論見報後第二日已經有投訴，佢也做咗解釋。
黃良昇話用市建局嘅賠償幫居民喺同區搵樓，實際可以揀嘅好少，原因係近期樓價升得太快嘞。所以勸啲居民盡快買樓，擔心農曆年後，樓價會再大升。
利嘉閣地產董事總經理Ivan（何紹章）（圖三），除對樓市有研究之外，對其他投資都好有心得。利記後勤讚Ivan介紹嘅投資幫佢哋搵到啲，蘭西就問吓佢今年嘅睇法。
Ivan話因為美金會繼續下跌，幅度有一兩成，所以澳元同黃金係最值得持有。澳洲出口強，經濟好，估計重會加息，而黃金估計會見四百五十至五百蚊美金。
佢又話股市短期會狂升，估計年中可能會回落，所以暫時唔沾手。
至於住宅樓市，佢認為買嚟自住無妨，投資就要顧住財政能力至好。
樓市轉勢，大手買賣通常都係住宅較多，不過原來工廈都唔弱。聽美聯助理區域經理李麗嫦講，物業係葵涌藍田街新華工業大廈，八層高，每層五千呎，總樓面約四萬方呎，以一千萬賣咗，每呎計落都係二百五十蚊。
蘭西
電郵地址：
