梁漢文有一位拍拖六年的模特兒女友Karen，其實他入行以來傳出的戀情不多，除了湯寶如之外便是Karen，Edmond不諱言Karen是唯一曾與他共度患難的女友，Edmond猶記得他在內地不停拍戲的年多時間裏，女友只能獨個兒留在港，他說：「其實我女朋友以前好依賴，但𠵱家佢已經獨立咗好多，都係一件好事嘅。」
那麼Edmond打算何時才拉埋天窗？他說：「我諗三十五歲之後啦，如無意外呢個都係我結婚對象，至少我希望係。我女朋友成日話好想有個童話式嘅婚禮，佢最想坐南瓜車，如果係咁去迪士尼搞咪最好囉，不過如果我結婚，我一定會擺酒，唔會收收埋埋，大家一齊開心吓嘛，老人家都鍾意。」
Edmond女友雖然是模特兒，但近年工作量並不太多，不知是否因為有Edmond照顧？Edmond說：「其實男人照顧女人，天公地道，有乜問題？」不過Edmond還補充說：「但佢其實一路有做嘢，佢都幾有作曲天份，𠵱家已經唔係模特兒，佢簽咗畀謝霆鋒間公司做作曲人，佢都好鍾意音樂㗎，我之前有首歌都係佢作嘅，不過大家唔覺啫。」
梁漢文身邊有不少好友，提到在困境時兄弟出錢幫忙度過難關，Edmond感激說：「成班兄弟咁多年感情，我啲嘢大家都知道，其實嗰時架車真係爭一期會就供完，點知就衰收尾，其實𠵱家一早供完重賣埋㖭，我覺得佢唔係幾利我，擁有過咪算囉。」
雖然近日不時傳出Edmond與許志安不和，但Edmond表示兩人關係沒有改變，還是經常一起踢波，Edmond續說：「有咁大班朋友真係好難得，其實除咗安仔之外，我重要多謝蘇永康，係佢請我做佢演唱會嘉賓，之後黃柏高就搵我傾，好多嘢都好似天意嘅安排，包括過去兩年嘅艱苦日子，唔捱過未必有今日。」
撰文：胡比、蔡如育 攝影：何國豪