身兼地產建設商會會長嘅賭王何鴻燊，早排大鬧「紅鬚軍師」，引起商界同地產界好大關注。有地產界中人同八方講，賭王好耐冇片紅鬚軍師，今次佢老人家咁勞氣，內裏肯定大有文章，八方嘅地產好友打探之下，果然發現當中嘅內情。
地產老友話，江湖傳聞，去年十二月嗰陣兩位特首上京述職，香港阿華就俾溫總好「揪心」咁「關心問候」完，唔知係咪溫總太過「揪心」，見澳門鏵哥時，心情重未平復，仍舊念念有詞。傳聞席間有人提到紅鬚軍師個名，席上嘅人想聽吓呢位「軍師」係咪有計之人。紅鬚軍師有冇計大家心知肚明，席上諸公點答溫總就冇人知，只係知呢個消息唔知點解走漏咗，有知情人士於是做個順水人情，話埋畀賭王聽。
為免紅鬚軍師上位，賭王就先發制人，開重炮先打沉紅鬚軍師，否則萬一香港阿華要提早「保內就醫」，紅鬚軍師坐正做香港話事人就大件事。
地產老友話，呢個故事係真係假，梗係冇人會證實，但係賭王片紅鬚軍師言論，肯定係地產界班「大孖沙」心聲，佢重話，到今日班大孖沙講到八萬五重咬牙切齒：「第二件事班大孖沙或者會有唔同意見，一講到打沉紅鬚軍師，大家就真係坐埋一條船！」
傳真︰2623-9278
電郵︰