蔡國權嘅家人同太太，舊年就有關蔡國權嘅治療安排發生拗撬，後尾佢哋重因為爭蔡國權嘅監護權出現歧見，搞到監護委員要將蔡國權嘅監護權暫交社會福利署㖭。
日前蔡國權喺內地接受完治療之後返香港，被社署安排佢入住沙田慈氏護養院，因為要佢隔離七十二小時先，令蔡太好不滿，佢話前日已經同申訴專員公署進行投訴，希望同丈夫攞番個公道。
不過，馮仁昭聽聞蔡國權太太同家人最近分別搵咗律師，希望同社署攞番蔡國權嘅監護權，前日馮仁昭就打電話畀蔡國權個妹妹，點知佢妹妹好大反應咁話：「有好多問題上咗法庭，會影響到成件事，你哋小心啲唔好亂寫嘢，香港係有法律，總之大前提我哋都係想快啲醫好哥哥嘅病。」
馮仁昭覺得蔡國權太太同家人雙方都想蔡國權早日康復，但如果真係為佢着想嘅話，係咪應該拋開所有成見，同心照顧蔡國權先呢？
女子十二樂坊將會喺今個月十五號喺紅館開四場音樂會，啲飛賣晒咁滯，本來主辦單位想加開十六號日場，但又怕佢哋太辛苦，於是打消念頭。陳慧琳更已落實擔任十五同十六號晚嘅嘉賓，重會唱三首歌㖭。原來女子十二樂坊吸引咗好似我馮仁昭呢類廣大市民外，連政務司司長曾蔭權都好鍾意佢哋，佢重撲咗兩張飛到時去捧場。
無綫高層何麗全去年因為廉署「舞影行動」而被調離綜藝科，但因為佢嗰個「特別項目」部門根本冇乜嘢做，令到何麗全好冇癮想辭職，無綫於是就建議佢返綜藝科。馮仁昭收到風，何麗全聽日（十二日）就會返番去綜藝科恢復原來職位，但佢以前負責開嘅事務會唔會有變動就不得而知。
曾志偉最近以佢嘅友情搵咗劉德華、張學友、陳冠希同余文樂演出《英雄無用》呢部戲，聽講志偉想令影市更旺，拉攏大卡士演出，余文樂同陳冠希雖然之前有爭執，但佢哋自從上次幫港姐拍特輯後，感情重好似好咗㖭，所以都唔介意再合作，更何況呢部戲可以同華仔、學友兩個前輩碰頭，重唔趁機偷師咩？
陳彥行（行姐）噚日出席活動，行姐話上年年尾跟一班朋友去睇紫微斗數，本來佢都唔係迷信嘅人，但係點知又講得好鬼準，行姐話：「佢話我今年支氣管會有問題，又真喎，佢重話我有好多嘢做，同埋有好多桃花，咁我真係有好多人追！」既然咁多選擇，咁行姐要好好把握啦。
梁詠琪噚日喺銅鑼灣出席簽名會，對於去年歌唱成績大豐收，佢話：「好開心！所以今年預咗用五位數字去封大利是派畀工作人員。」GiGi重話新年會同屋企人去旅行，問到佢半個屋企人嘅伊健會唔會一齊去，佢話：「佢應該要做嘢，可能之後會再約我哋。」啲碟咁賣得，同伊健感情又好，GiGi重唔係事業愛情兩得意？
