唔使我羅拉多講，大家都知Morining娘家族唱片銷量已經大不如前，最近佢哋為咗繼續搵銀，就轉咗狂出寫真集，平均每個月兩三本。啱啱喺聖誕新年，就輪到被喻為最靚女嘅石川梨華新書《I》出場。
「I」喺日文嘅發音同「愛（ai）」差唔多，華妹話揀呢個名，係希望喺呢啲溫馨佳節fans可以感受到佢嘅愛喎。
原本華妹去北海道取景，但佢明白包到成隻裹蒸糭咁影嘅雪景look係唔夠嘅，點都要番啲水着相撐住，所以華妹去埋沖繩樹林影靚相。
不過，華妹係超級惹蚊嘅人，入到樹林，工作人員只要黐住佢，重好過搽蚊怕水，自豪嘅華妹呢個時候話：「梗係啦！我出好多『荷爾蒙』㗎！」啲工作人員聽到𢱑晒頭，乜荷爾蒙會惹蚊㗎咩？華妹先補鑊話：「係『引誘分泌』至啱！」原來呢兩個字喺日文發音好似，華妹就咁暴露咗自己生字都唔識多個，結果係點？咪多咗個花名叫「荷爾蒙」囉！