對於中國球員董方卓加盟曼聯一事，我求大俠都期待可以盡快落實，到時又多一個中國球員登陸英超。最新消息話曼聯會畀佢五十萬鎊（約七百萬港元）年薪，真係未加盟已先贏聲勢！
事關當年國際賽經驗豐富嘅范志毅大將軍同「老孫」孫繼海，過去英格蘭搵食，最多都係近一萬鎊周薪；𠵱家「小董」以名不經傳，甫加盟都有咁高人工，以亞洲球員來講，都未話唔嚇親人。
其實，計正「小董」應該唔夠國際賽上陣標準，就算曼聯係大球會有地位，英勞工處都唔容易批工作證。不過，據路邊社消息透露，「小董」會借去曼聯友會安特衞普，一邊吸收比賽經驗，一邊搵成幾十萬港紙一個月，恨死隔籬。
我求大俠聽到修咸頓領隊史特根話玩埋今季就引退，感到震驚之餘，同時亦有所體會。環顧當今英格蘭球圈，球隊領隊平均年齡愈來愈低，相信都係同當地傳媒所畀壓力有好大關係。球隊經歷低潮，傳媒例牌將矛頭指向領隊，真係唔夠耐力都頂唔順呢類負面報道㗎！
今季打得好醒神嘅羅馬前鋒卡斯辛奴，喺早兩日操練又同教練卡比路不歡而散。當時卡比路「教訓」卡斯辛奴唔好打咁多高章波，話佢唔係馬勒當拿！畀人咁樣窒法，自傲嘅卡斯辛奴梗係唔順，又試玩離場走人。呢次已係兩人第三次傳不和，睇嚟都會影響今日對佩魯賈嘅士氣喎！
柏林哈化𠵱家喺德甲排尾二，班球員原本要減薪兩成半以示懲罰，但佢哋唔制，於是總經理D漢尼斯就改要佢哋夾一百萬歐元，請四千球迷喺下半季睇作客聯賽。哈化球員都幾絕，寧願益球迷都唔益球會，唔怪得做咗代罪羔羊被會方炒咗嘅荷蘭籍教練史堤芬斯，話佢哋正一自私精啦！
NBA湖人近排四條A缺咗奧尼爾同馬龍連輸四場，眼見積遜教練正要苦嘗十三年教波生涯第二次五連敗（嗰次喺九四年佐敦退休嘅公牛），都識得爭氣，拜恩同馬達丹高齊齊攞二十六分，重贏上兩季作客都爆冷贏波嘅鷹隊。如果湖人每場波都識知恥近乎勇，下半季積遜安樂囉！