香港球迷睇波愈來愈熱情，好似場女單決賽，唔少球迷都趁比賽空檔大叫球手名字打氣；不過以數量計，都係叫舒拉寶娃個芳名「Maria」較多，睇嚟靚女都係着數啲，尤其是俄美少女舉手投足間的魅力，簡直是新一代「殺手」。
噚日決賽，唔少球手啲親戚朋友都有到場打氣，好似大威媽媽、舒拉寶娃爸爸、費達拿女朋友等，威姐嘅媽媽重好熱心，揸部長鏡相機為囡囡影相，而威姐都好識做，攞獎時特登擰向觀眾席，擺個靚姿勢畀媽媽影相。
當威姐揸住獎盃繞場一周時，有個小球迷送咗個公仔畀佢，不過威姐收咗後似乎唔多受落，即時轉交畀身旁的工作人員揸住；原來嗰個係馬騮公仔，難怪佢唔多受落。
維園中央網球場難得爆滿，多得一班世界級球星撐場；香港台維斯盃亦趁勢大做宣傳，事關下月六至八號會喺同一場地進行「亞大區第二組台維斯盃」第一圈，由香港首次出戰科威特，重請咗個人喺維園門口派台盃入場券。