《蘋果》體育版講中國三位NBA球員巴特爾、王治郅、姚明逐漸褪色，其中巴特爾已經冇得玩，唔夠水平，王治郅雖身高七呎一吋，冇法子在內線硬拼，亦在被淘汰邊緣。姚明全靠身高手長（七呎五吋高？），投射技術了得，重可以擔任火箭隊第一中鋒，但表現就不如預期咯。
睇到《紐約時報》一篇文章，先至知道美國籃球界對姚明有點失望，原因好簡單；就係姚明唔夠茅，唔夠勇，唔得自私。火箭教練雲根迪搵大猩猩前鋒伊榮做姚明教練，就係教佢打衝撞波，有機會就灌籃（dunk），俾人夾擊得緊要就不妨開踭撞人，殺吓對方威風；入到內線就應該飛身上籃，唔好交番個波出外線。
教咗幾個月，姚明做唔做得到雲根迪、伊榮要求呢？唔多掂噃。至於內裏原因，竟然涉及文化問題，因為姚明話在中國長大、打籃球，慣咗俾教練、隊友灌輸團隊合作，場上唔好沙塵（對住矮過自己嘅球員而灌籃，就係冇禮貌兼招積），唔要獨食。呢套方法剛好與美國NBA文化相反，所以姚明雖經伊榮耳提面授，仍然硬不起來。美國體育作家話，姚明如果打得夠狼，有奧尼爾幾成咁霸道，一定可以成為NBA偉大中鋒也。
我哋以前去見工，師傅教落，見美國公司就要夠aggressive，見華人公司就要扮謙虛；睇嚟姚明喺美國搵食，需要調整心態！