按舊曆，今年係「宋亡三傑」之一文天祥嘅721歲冥壽，咁啱元朗新田文氏後人爭取興建嘅文天祥公園前日開幕，新鮮熱辣新景點，今日一於見識此首個以傳統歷史人物命名嘅公園，順道遊覽元朗區其他歷史文物，大發思古之幽情。
記者：陳震霖
攝影：林柏鈞
模特兒：Sing、Long（Sunspot）
公園位置喺新田鄉，佔地2萬公頃，所在原屬文氏原居民公地，公園正門一個5米高麻石牌坊，牌匾左右寫住「正氣」、「流徽」4個大字，嘩，真係過牌坊都Feel到文天祥嗰份傲然正氣，拍攝當日正值公園開幕吉日，台階兩邊插滿五彩旗幟，隨風飄揚，行80級石階，上平台，文天祥銅像就在眼前。
銅像連基位高8米，由南京名匠精心鑄造，面向北背向南，點解？等文天祥可以遠眺江西故鄉嘛；左手執寶劍，腰板挺直，鐵錚錚硬漢子造型；論五官，表情不怒自威，雙目炯炯有神，想當年佢被元軍俘虜至伶仃洋海域，拒絕招降，睇怕都係咁上下表情。
睇完銅像，唔好咁快走住，銅像後面有玲瓏浮突嘅麻石浮雕，以漫畫形式簡述文公由高中狀元到寧死不降嘅一生事迹，當然唔少得文公首遺詩《過伶仃洋》足本，最末兩句「人生自古誰無死，留取丹心照汗青」，Sing唔明：「阿文生乜水？又為誰而死呢？」Long明顯有備而來：「文天祥係宋末名將，知不可為而為，明知大勢已去都誓死保護南宋帝昺，最後俾元軍俘虜，寧死都唔肯變節，喺大嶼山對開嘅伶仃洋作咗呢首詩囉，同陸秀夫、張世傑並稱『宋亡三傑』㗎。」所以話溫定書行文天祥公園，一定投入啲。
參觀完公園，順道睇埋東山古廟、大夫第，一條龍睇勻新田鄉名勝古迹。
東山古廟唔算大，特別之處係同時有3個隔室，分別供奉天后、土地公、侯王、雷神同龍母。如果大家農曆三月廿三嚟古廟，前面廣場重有木偶戲睇㖭；大夫第主人叫文頌鑾，咁蹺又姓文？據說文頌鑾先祖同文天祥有血緣關係，中式大宅有西方建築風格，屋內通道上拱門有彩繪玻璃、巴洛克式花葉浮雕，左翼重有個花廳，「花廳」？大家唔好心邪，其實「花廳」只係學習室，係當時文頌鑾子女嘅私人溫習室。
最後去屏山文物徑，香港名勝古迹大把，點解要嚟先？原因好簡單，因為文物徑短短1公里，已經有超過15個古迹，全程有路牌兼地標帶路，一定睇得晒。初段有700年歷史嘅鄧氏宗祠，係香港最宏偉古老嘅同類形宗祠，樓底近20呎高，前門大堂面積大到無倫，過時過節開番八、九圍盆菜都無問題。
中段有600年歷史嘅楊侯古廟，廟前石枱有超過20個神像，包括關公、觀音、黃大仙、壽星公、多仔佛等等，多數係善信留下，名副其實滿天神佛；盡頭係香港唯一古塔聚星樓所在，相傳聚星樓係風水塔，擋北煞、鎮水災、庇佑族人在科舉中考取功名，睇番鄧氏歷代人材輩出，真係咁靈？
