上星期三董特首朗讀完佢第7份施政報告，其中一項係關於本地物流業未來發展計劃，雖然伏勝覺得香港要做物流中心其實都幾困難，尤其係本地營運成本實在太高，夾硬去馬，分分鐘適得其反。不過，伏勝覺得仍然值得一提，因為記得有位搞基建嘅朋友講過，話政府好似為咗要令到物流業喺本地落地生根，喺港珠澳大橋興建行車通道外，重會考慮另外起多一條鐵路連接珠海同澳門，到時車路加鐵路雙管齊下，藉此鞏固本港成為區內嘅物流中心地位。
如果個朋友所講係真嘅話，對於地鐵（066）絕對係天大喜訊，皆因𠵱家可以去到大嶼山嘅鐵路只係得地鐵系統，若果真係計劃用鐵路連接珠海同澳門，地鐵會成為呢個計劃嘅大贏家。上個禮拜地鐵搵咗幾間大行發新債，用嚟興建迪士尼線嘅項目，地鐵嘅大嶼山概念真係想窮都難咯。地鐵股價上周五勁升6.5%，見到有好多「大冧把」喺度買貨，照睇重有後着，應該可以諗諗。
上星期最傷嘅要數中石油（857）同中石化（386），佢哋喺國指裏面嘅比重最大，大戶要推低國企指數，就一定會向呢兩隻股份開刀。不過，不幸中之大幸就係上周有鬼子佬行指出，今年國際油價可能回落，對於石化股有利。就因為呢個原因，連跌4日嘅中石化終於可以喺上星期五反彈，伏勝有個有做開中石化沽盤嘅行家講，雖然隻股開始反彈，但係唔少大戶喺低位一路買上嚟，成本價仍然係偏低，所以若果隻股無辦法回復升勢嘅話，班芬佬仍然會繼續沽貨，博反彈追貨嘅朋友呢舖要特別小心。
伏勝