《猛鬼街》法迪、《黑色星期五》積遜，兩個都係西片中嘅恐怖經典！今個星期新出嘅最新DVD《鬼王再生》，兩大邪惡軸心人物大玩Crossover！真係可以用兩個系列中，最血腥暴力嘅一集嚟形容（所以列作三級），心血少者，今個星期真係要避之則吉！
記者：朱崇德
《鬼王再生》其實在2003年中，曾經在香港戲院上映！想當時反應麻麻，所以冇耐就落畫！但反之歐美等地國家，就絕對係大收旺場！無他嘅，法迪同積遜在西方人社會，真係家傳戶曉嘅恐怖人物，大家少咗啲文化背景認識，睇得冇咁投入，所以未必能欣賞到當中精髓。
其實早在80年代初期，電影公司已經有意要將法迪同積遜呢兩隻惡鬼溝埋一齊玩Crossover，不過直至今日至拍成電影；而執導演鞭者，大家亦好熟識，他正是98年《娃鬼新娘》之後，第二部進軍荷李活恐怖電影的于仁泰導演！
故事都好搞鬼，講由於人類發展出一種「降夢素」的藥物，令鬼爪法迪再唔能夠透過夢境殺人，於是法迪諗計，使積遜復活，並暗示它去「猛鬼街」四出殺人！從而勾起人們對它的恐懼回憶，從而令每個人的「惡夢」重臨！從此現實世界中有積遜四出殺人，夢中有法迪把守，令人每一刻都活在恐懼之中。
《猛鬼街》法迪，是出自恐怖大師韋斯卡拉奇雲導演手筆，由84年至94年間，先後推出過7集，死於它的鬼爪及惡夢下亡魂，前後共有30多人；至於《黑色星期五》嘅積遜，對佢追溯年代更久遠，首部電影拍成於80年，先後共拍了10套續集，死於它的冰上曲掍球面具同開山刀下亡魂，共計有127人之多，所以呢兩隻惡鬼，絕對代表着恐怖及死亡；今次重要大玩雙鬼拍門，你話有乜辦法唔係血腥大賤賣呢！
自《白髮魔女傳》開始，已經覺得于導演好鍾意將人斬件，今次去到電影尺度更寬鬆嘅西方拍片，再加兩隻殺人為樂的魔頭！所以戲中大家成日會見到啲腰斬、殺頭，甚至將人「大赦七塊」嘅場面，真係極盡恐怖之能事！
電影另一成功之處，就是時常加入一啲「懷舊位」！法迪點解會俾人監生燒死，變成惡夢一般的「幽冥鬼爪」，積遜有乜童年恐怖回憶，點解死於水晶湖底後，都要化成厲鬼，殺戮人間，在這集《鬼王再生》中，都會有詳盡解答！于導演最搞事之處，就係成日搵嚟一啲《猛鬼街》內的亡靈間場，大家見到佢個樣似曾相識，但又唔記得佢死喺邊一集，真係幾好笑！
講到全套戲嘅高潮所在，當然係兩個擁有不死之身嘅法迪同積遜嘅大對決啦！事緣法迪只想利用積遜勾起人們對它的「惡夢回憶」，可惜積遜卻殺得性起，時常截在法迪之先，將人們殺光！於事兩人之間嘅利用關係，就變得是「利益衝突」，最後雙鬼在人們悉心安排之下，在水晶湖營地大對決！
由於電影是一套殺人的恐怖劇，所以拍法使用了極端的暗沉色調，不得不提是音效使用了較高階的dtsES，雖然唔稱得上甚麼試機正片，不過如玩埋6.1聲道效果，恐怖氣氛會更濃厚！
特別收錄冇乜！主要都係電影預告片，就有啲失望，不過演員介紹幾詳盡，例如飾演《猛鬼街》法迪的羅拔英格倫，由84-94年間所拍過的《猛鬼街》系列，同98年的《猛鬼傳說》都作簡略介紹！
