手機自從加入鏡頭之後，玩意愈來愈多，除咗影相之外，部份高價啲嘅機種更設有拍片功能，雖然質素唔算得上高超，不過叫做多樣野玩，彌補影相不足之處。而今日就搵嚟時下3部拍片手機，除咗試試邊部最好拍、最易拍之外，更去到K場、商場等蒲點，睇睇效果又係點，等大家可以隨時蒲隨時拍！
記者：劉耀祥
攝影：陳偉強
ImageGirl：Wendy
影相手機現時真係成行成市，不過兼具拍片功能，價錢就相對較貴，而今次就試試SonyEricssonP900、Nokia7600同MotorolaA760，三部都具有30萬像素鏡頭，睇睇邊部先可以拍得最就手。
用手機影相不嬲都玩意多多，既可以加閃燈，又可以加相框，不過拍片就相對少嘢玩好多，3部之中較為多拍片設定嘅就要數SE嘅P900，除可以自行調較畫面光暗及對比度之外，更可以調校環境模式，室內室外都有得自己揀，以及選擇儲存於機內記憶體或者記憶卡都得，聲音及畫面都有三級調校。論拍片長度亦以P900居首，長度完全視乎記憶卡容量，一張32MB可連續拍足10分鐘，而Nokia7600就有29MB記憶體，每段最長可拍2分半鐘；MotorolaA760就有32MB記憶體，有四種光暗模式及效果設定，每段短片最長2分鐘，雖然都唔算短，但當然以P900的無限任拍過癮得多。
重播畫面中，以P900及A760設有全螢幕重播，不過由於解像度唔高，起「狗牙」、鬆朦情況就走唔甩。值得一提就係A760重播音量極大，重播時會出現拆聲情況，而且重播中不能調校音量，所以睇片就記得冇乜人喺隔籬先好睇。
7600夠光猛
去唱K影相張張都差唔多，來來去去都係拎住支咪，所以拍片就最好玩，又可以錄低晒走音蝦碌過程，而且加上K房環境昏昏暗暗，對拍片手機更係一大考驗。3部30萬像素相機以7600最出色，不論喺電腦度睇定用手機即時重播，整段片質素都為三機之冠，畫面夠光猛不在話下，而且重播速度流暢，聽歌都唔會窒吓窒吓。而P900及A760雖然可以用全螢幕睇番補數，不過論整體清晰及光亮就不及7600，尤其P900更出現「黑面神」情況，記得開大啲盞燈先好影。
顏色濃厚P900
去完唱K，行商場都係最多人鍾意做嘅活動之一，而商場內光線雖多，但光源較難捉摸，隨時都會出現時光時暗情況，不過喺K房測試表現欠佳嘅P900反而效果最好，顏色最為豐富，雖然影像較為模糊，不過前後景都可以睇得到，乃三部機之中效果最為出色。而A760及7600顏色表達能力較弱，色彩表現都趨向淺淡，尤其於電腦中觀看稍為有黑白片Feel。最後一提就係三部機於流暢度及收音方面都相當唔錯，重播片段都相當出色，處理圖像能力完全合格。
