今晚無綫舉行的《勁歌》頒獎禮，節目開始時會安排眾歌星向梅艷芳、張國榮及林振強致敬，昨日綵排時司儀陳百祥顯得最為傷感，而大會亦會頒發十大金曲榮譽大獎給林振強。
無綫《2003年度十大勁歌金曲頒獎典禮》將於今晚舉行，節目開始時一眾歌手會先向去年逝世的梅艷芳、張國榮及林振強致敬，而大會亦會頒發十大金曲榮譽大獎給林振強，由譚詠麟頒獎、林燕妮代表上台領獎。
昨日一眾歌手包括李克勤、楊千嬅、陳慧琳、梁詠琪、容祖兒、陳小春、鄭中基、梁漢文及Twins等均有出席綵排，現場播放阿梅和張國榮的片段，眾歌手亦跟着一起唱阿梅及張國榮合唱的《明星》，身為主持的陳百祥（阿叻）顯得十分傷感。
阿叻透露會穿上素服做司儀，他說：「平時呢個頒獎禮係曾志偉做，但志偉心情唔好，我係報喜不報憂嘅人，所以我代佢做，希望大家唔好咁傷心，阿梅都唔想大家咁悲傷。」對於梅媽揚言要爆料，阿叻說：「呢啲係花邊新聞啫！喺我心目中阿梅係空前嘅巨星，以前佢都試過深夜打電話同我傾偈，好懷念嗰段日子。」
阿叻自言與梅媽並不相熟，他說：「佢老人家呢幾年冇咗兩個女，要畀佢發洩吓嘅，阿梅係佢親生女，喺最後階段梗係想見啦，其實冇話邊個啱邊個錯嘅。」
《勁歌》最受歡迎男女歌手大熱門分別是李克勤和容祖兒，李克勤透露唱片公司重金禮聘了鋼琴家郎朗出席頒獎禮，他希望可以上台唱《我不會唱歌》一曲。有消息指容祖兒早前在商台奪得女歌手獎後，暗寸其他歌手要繼續努力，祖兒及千嬅的歌迷更在網上罵戰，對此祖兒說：「當時我只係想話，唔知下年要做啲乜先可以令大家更加鍾意我，我成日講嘢都講一半吞一半，呢件事如果令到人唔開心我自己都會好唔舒服。」對於會否獲獎，祖兒說：「我唔想有太大期望，如果到時唔係又會好失望。」
昨日楊千嬅與祖兒有傾有講，她們表示不擔心歌迷敵對會演變成fans為偶像動粗的事件，千嬅更表示經常叮囑歌迷不能用暴力。提到容祖兒是大熱門，千嬅說：「今年唔得咪出年嚟過囉！」
採訪：胡比、王連連 攝影：仇志德
