若大家早前有留意我哋嘅報道的話，相信都會知道德國平治車廠，將於今年內推出新一代SLK跑車；但廠方卻已於日前，公布新車將會喺嚟緊3月正式登場，屆時勢必令車壇掀起一陣哄動。
屬第二代嘅全新SLK正如先前嘅報道所述，造型帶有點同廠SLRMcLaren跑車嘅影子，其中低斜頭燈襯以設計獨特嘅鬼面罩，就最能夠將呢個特點展露出來；電動硬摺頂開關亦甚為方便，輕按控制鍵後便可於22秒內完成整個過程，全不假於人手。
車廂空間則由於尺碼較前有所增加（車長增多72mm，闊度增多65mm），因而較前變得更見闊落，匹配經過重新設計嘅鋪排，以及齊全嘅設備配搭，乘坐既愜意又舒適；另外值得一提嘅係，廠方特別為新車安排一套全新嘅AIRSCARF系統，只需輕按控制鍵，頭枕便會滲出柔和嘅暖風，可令車上乘客嘅頭、頸及肩部經常保持溫暖嘅狀態，咁就算響寒冷嘅天氣下，都可以讓你盡享開篷駕駛樂趣。
機械配搭方面，廠方就為SLK350型號，安排有一台全新3.5公升V6偈（272匹），運轉寧靜之餘又慳油，而SLK200Kompressor則以一台同屬新設計嘅直4偈作核心，馬力輸出為163匹，加上頂級SLK55AMG所配用嘅5.5公升V8偈（360匹），性能表現毋庸置疑；而用家更可選擇配用全新嘅7G-Tronic半自動波箱，令新車表現更上一層樓㗎！