剛於美國底特律舉行嘅北美國際車展（NorthAmericanInternationalAutoShow），會場內展出有多款新車，無不令在場車迷歎為觀止；而響福特嘅展館上，除早前曾作介紹嘅Bronco概念SUV備受注目外，另一部有望於今年底前推出嘅新款Mustang跑車，亦吸引到唔少車迷駐足細看。究竟新車有何吸引力？大家不妨一齊嚟睇睇。
記者：鄭達基
向來走高性能跑車路線嘅福特Mustang，由1964年登場至今，轉眼已有40年嘅光景，多年來廠方都為其作出不同程度嘅變革，因而成為鍾情車迷嘅追捧對象，難怪Mustang會被譽為係美國高性能跑車嘅代表之一啦！
為要營造出一份教人難以抗拒嘅魅力，廠方特意為新款Mustang，勾劃出一個頗有懷舊味道、兼且極富肌肉感嘅造型，相比起現有型號來得更具吸引力之餘，更散發出濃烈嘅跑車韻味；正如圖中一部頂級版MustangGT型號，喺鬼面罩上更加有一對霧燈，響沿用多年嘅野馬徽章、貼於車身兩旁及車尾嘅特製GT徽章，以及大型跑車合金胎軨襯托下，嗰份誘人魅力實在叫人難以抗拒。
無論係普通Mustang，又或者係頂級嘅GT型號，其車廂鋪排都予人感受到一份高性能跑車色彩；不過，若要數最惹人注目嘅配搭，相信一定非頂級GT版本莫屬，皆因空間寬敞闊落之餘，簡潔表板鋪排附以鑲有電鍍框邊嘅車速計及轉數表，清晰易讀之餘，望落重好有舊款Mustang跑車嘅味道。另外，以鮮紅色作主調嘅真皮座椅承托力充裕，乘坐倍覺貼服舒適，當然唔少得重有既齊全、又易用嘅設備配搭啦！
福特廠方為新一代Mustang提供有多個引擎配搭選擇，其中頂級GT版所採用嘅一台4.6公升V8引擎，除馬力輸出高達300匹外，就連廢氣排放量及耗油量都要較前來得更低，從而達致環保及慳油嘅好處。
另一方面，全新設計嘅底盤結構，用上前輪麥花臣支柱，及後輪三連桿作組合嘅懸掛系統，響四輪高性能輪胎組合，同埋多套電子系統嘅輔助下，行車循迹性之高予人莫大信心，就連四輪制動碟亦屬高效能組合，務求予人收放自如嘅觀感呢！
