相信好多球迷都好渴望現場睇到日前車仔迎戰利記嘅比賽，但皇馬前鋒朗拿度有咁嘅想法就萬萬不能！點解？且聽我求大俠慢慢道來。
話說有「油王」撐腰嘅車仔近排繼續周圍班兵，隻手伸到去朗拿度嗰度，搞到皇馬高層瞓唔安食唔落；結果最近西班牙傳媒披露朗拿度本來想去睇車仔對利記，但俾皇馬禁止佢去倫敦，阻止佢同車仔老細阿巴莫域治咬耳仔，搞到呢個天王巨星冇晒癮。
又係嘅，皇馬𠵱家喺西甲俾華倫迫得咁緊，上場迎戰梅西亞又踢到走晒樣，重有碧咸同施丹有傷有病，下個月歐冠盃重要火併拜仁……總之，皇馬新嘅一年真係好多難題；如果朗拿度一個屈尾十走埋，真係屋漏兼逢連夜雨，重惡搞，難怪皇馬出到禁睇令咁重手。
交通意外整傷右腳
球迷應該重記得前年幫巴西攞到世界盃嘅龍門馬高斯。呢位仁兄自世界盃後一直唔如意，包括去埋倫敦話加盟阿仙奴觸礁、失去國家隊正選。今季佢協助彭美拉斯升班，以為會順景，點知最近響宗電單車交通意外中整親右腳，據講嚟緊巴西聯賽季初都唔使預佢，唔係黑成咁啩？
巴治奧真與佛有緣？
近日盛傳有間中超球會想簽意大利球星巴治奧，而巴治奧嘅資料已經透過經理人傳到某間國內球會，呢間球會好可能係大連實德。呢單消息係流定堅重未知，就算消息真，巴治奧肯唔肯紆尊降貴亦係另一回事。中國係個佛教興盛的國家，唔知呢樣嘢夠唔夠吸引巴治奧加盟呢？
第四魔咒復現
曾升過上英超第四位嘅修咸頓，近排戰績麻麻，前晚主場同李斯特城悶和引嚟球迷媽聲四起。領隊史特根笑罵由人：「球迷畀得錢入場睇波，自然有權歡呼或者發出噓聲。」查實愁嘅唔止修咸頓，查爾頓前晚失分畀曼城，第四位置隨時俾利物浦搶走，呢個「四哥」三煞位果然難坐穩。
艾華遜最憎人打面
可能76人嘅艾華遜喺球場上好似打極都冇事咁，所以快艇嘅侯斯響噚日嘅比賽，就趁AI偷到波快攻之際，一嘢打落AI塊面；點知即刻辣到佢「㷫晒」。原來賽後AI講番，打手打腳打細佬都唔緊要，但最憎就俾人打面。結果？快艇梗係成為呢位大哥發火下嘅犧牲品啦，輸成二十分。