廣東丹霞山陽元石、南丫島陰山不文石，似就似男性那話兒嘞，不過一柱擎天太有霸氣，嚇親女仔，鶴咀「倒垂不文石」就唔同嘞，好含蓄咁維持「靜止狀態」，啱晒情侶拍拖浪漫遊，男仔見到一定話似，女仔見到都唔會面紅。
記者：陳震霖 攝影：梁細權
模特兒：Felix、Green（Space2）
「倒垂不文石」位置離鶴咀道不遠，不過埋喺路旁離地面10米嘅石窟裏面，幾難搵。當日小記左穿右插，花45分鐘重搵唔到，正想放棄，Green忽然大嗌：「咦，有人噴咗隻蝴蝶喺石上面，擺明指路喇。」跟住蝴蝶圖案嘅箭嘴指示方向，上爬3米左右，終於見到──另一個蝴蝶圖案，「玩嘢咩？不如走咯。」Felix呻笨，Green不忿：「唔信搵唔到。」估唔到搵不文石，女仔會更落力。
Green慢慢攝入石窟，石窟面積有80呎，高3米，石頭有啡色石紋，幾似雲石，望真，原來係山水沖刷做成嘅痕迹：「嘩！真係好似呀！」「倒垂不文石」正正喺石窟右上方，無丹霞山陽元石咁一柱傲穹蒼，反呈45度向下軟垂，不過話晒亂石群中冒出頭來，氣勢亦一時無兩。
勇闖石窟，出完一身大汗後，不如輕輕鬆鬆入石澳，登大頭洲繼續浪漫。沿石澳道，經石澳村，過石澳山仔路，盡頭係個石灘，落石灘向左行就到大頭洲。行去大頭洲？話明「洲」，點行去呀？我無講錯你無聽錯，大頭洲與石灘有石橋相接，過橋，就可以穿洲。
30分鐘已經可以上到大頭洲最高點，吹完海風，坐喺臨海亂石，手執情人之手，聽泊岸浪濤聲，卿卿我我，無人騷擾，重唔浪漫到暈？
重未夠浪漫？好！一於去埋石澳正灘玩沙灘漫步，漫步完再上燒烤場盡頭嘅「天涯海角」，「天涯海角」？也東東先？查實係近海嘅一個小山岬，沿樓梯直上，有僅容2人的水泥「情侶椅」，坐低，遙望對出嘅五分洲。橫掂有山又有水，重唔乘機海誓山盟？天濛光喺度睇日出，個意境更加無懈可擊，三兩句甜言蜜語，成個人畀埋你都得喇，可惜拍攝當日「天涯海角」俾大班釣魚發燒友霸佔咗，想影番張情侶咿挹相都唔得，大殺風景。
浪漫停不了，玩盡啲，化身栢芝同星爺，重演《喜劇之王》經典搞鬼一幕。石澳健康院旁邊嗰棵大樹，就係星爺同栢芝戲中對望傾情嘅「定情樹」，Felix同Green雖非情侶，但兩位星爺影迷見到棵樹都忍唔住要扮鬼扮馬，互相調情，自娛一番。唔好走住喎，石澳後灘間酒廊係咪熟口熟面呢？無錯，又係《喜劇之王》，星爺教口靚收陀地一幕，就喺呢度拍，不過今日唔係收陀地，而係好有Feel咁聽住浪聲，歎番支冰凍啤酒（每支$20）先走，唔飲酒，選擇汽水、咖啡、朱古力一樣得。
地址：石澳村273號－後灘（28092268）
收費：$500包酒廊露天燒烤場，包1包炭，食物自備，燒烤場最多容納20人
營業時間：星期一至五7:00pm至12:00mn，星期六、日及公眾假期1:00pm至12:00mn
肚餓咩？唔使擔心，推介惠康園炒番兩碟醫醫肚，龍鬚炒麵（$38）魷魚彈牙爽口，麵炒得乾身；廈門炒米（$38）芡汁份量剛剛好，米粉唔會太乾太濕，口感一流。
地址：石澳惠康園770號（28092836）
營業時間：11:00am至10:30pm
1.訪「倒垂不文石」：筲箕灣地鐵站乘9號巴士（$6.5），大風坳迴旋處下車，沿鶴咀道行10分鐘，石窟在路旁不遠處。
2.遊大頭洲：折返迴旋處，乘9號巴士，石澳總站下車，經石澳山仔路入大頭洲。
3.登「天涯海角」：沿石澳正灘行，位置在燒烤場盡頭。
4.回程：石澳總站乘9號巴士回筲箕灣地鐵站。