日前地鐵縱火案中喝止狂徒唔好亂嚟嘅「西裝友」英雄季詩傑（圖）一夜成名，連佢個部門經濟發展及勞工局都叨到光。季生得到局長葉澍堃公開讚揚，當然高興，但八方聽聞，季詩傑其實好唔想俾人當英雄看待，覺得壓力好大。
不過公務員事務局今年推出新嘅「公務員事務局局長嘉許狀」，局長王永平噚日話唔會頒畀季英雄喎，皆因嘉許狀係表揚過去五年工作表現卓越嘅公務員，唔係以一次事件嚟判定。
有官場中人笑話，呢輪姓季好hit，一個係大賊季炳雄，另一個就係季英雄，一個邪，一個正，都咪話唔橋。
講番季英雄，由於佢喺港口航運局上班，辦公地點喺交易廣場，所以佢因呢件事要去警局返唔到工，遲咗到，葉局長都唔會知，所謂山高皇帝遠，班夥計自己搞得掂，葉澍堃都唔會每事問。
不過有人話英雄當日返工遲到，八方真係要代為伸冤，其實佢只係因為地鐵九龍塘站同石硤尾站有事故，延誤咗二十分鐘，先至遲咗啲啫，啲老細唔好咁小心眼啦。
傳真︰2623-9278
電郵︰