廣州又整多單沙士疑案，最麻煩係病者一早傳出可能患上沙士，但官方卻否認，現時才向外界證實，令人有隱瞞疫情之嫌，港股噚日升升吓都要跌返轉頭，好彩有資金追捧中移動（941）同聯通（762），兩股分別急升4.8%及10.6%，令港股最終企穩於13200之上收市，恒指報13203，升45點，成交245.56億元。
國企股又傳配股抽水，其中江銅（358）據聞已準備就緒，只等月中股東會批出授權，就可以隨時進行配股。江銅受配股傳聞影響，被質低6.4%至4.725元，市場更傳出銀建（171）可能先下手為強，沽出手上的江銅。
不過，中國鋁業（2600）於上月中試盤配股時，股價亦出現震盪，但到咗本周正式落實配股時，31億元股份迅速認購一空，復牌後更出現挾淡倉的局面，投資者其實冇必要一聽到配股風聲就沽貨，但當然亦要睇緊，反應唔可以慢三拍。
中石油（857）繼續俾人掟，股價再插3.4%，收報4.275元，成交高達25.1億元。市場傳出，有策略性股東計劃出貨，現時市場資金充裕，兼且股價又升咗咁多，正是大手出貨好時機。阿虎覺得只要減持者唔係股神畢菲特，相信唔會有好大問題。
利來控股（221）大股東沽咗3600萬股畀基金，有基金捧場，股價噚日勁升24%，收報0.335元。
黑客話，據聞今次有基金接貨，是因為利來上半年業績唔錯，認為有得炒。
阿 虎