前任政務司司長陳方安生退隱江湖多時，但係每次出席公開場合都會令人眼前一亮，而且例必大受在場人士歡迎。噚日救世軍同港台搞咗個「愛心利是日」啟動禮，呼籲市民捐出一封利是做善事，身為「愛心利是日」大使嘅陳太，着住件紅色小鳳仙裝到場，成封利是咁款，非常應景，當佢見到一班歡迎佢嘅幼稚園學生時，即時四萬咁口，重同班小朋友打成一片，而小朋友嘅家長就帶埋相機出席，與八方等一眾行家爭位幫陳太影相，陳太嘅魅力真係唔講得少。
講番呢個捐款計劃，八方收到風，陳太已經向救世軍承諾，會鼓勵班孫仔一人捐一封利是；其他市民如果都想出一分力，可以致電27832333查詢。
（圖）陳太不嬲都好熱心公益，噚日着到成個利是封咁宣傳「愛心利是日」，好受小朋友歡迎。
王子俊攝
傳真︰2623-9278
電郵︰