馬主N飛落澳洲參加拍賣會，臨行打個電話嚟：「喂，星期六我隻馬出場，唔該你幫手拉頭馬，代我影威水相。」咁好？有冇咁大隻蛤乸隨街跳呀？講清楚啲，佢隻馬原來係預備做後補嘅，點知又做咗正選，惟有出賽，但佢又唔會出現馬場，惟有叫左丁山捱義氣落沙圈。知道前因，就知道隻馬嘅取勝機會麻麻，都係留番等隻馬跑快活谷跑千二米，抽到內檔先至好落注。
練馬師有時替馬匹報名，原本想做後備，因而取得下次目標路程嘅出場券，點知有時報名馬少，事與願違，就會打亂部署。好似馬主N個練馬師咁，季初預備一隻好馬跑沙田千八，知道屆時未必做到正選，於是先報一場千二，唉，好衰唔衰，竟然名列正選，做唔到後備，惟有焗住出賽，隻馬狀態好弗，出閘就跟前，入直路打衝鋒，當然唔夠跑啦。好嘞，兩個禮拜後報千八，哈，報名馬太多，你已經跑咗一次，今次做番後備，練馬師為之吹脹。再兩個禮拜後跑番千八，隻馬已經洩咗氣，博到盡都係跑第四，馬主嬲到震，立即拉倉轉馬房，練馬師惟有自嘆倒霉。
馬主N隻馬勝在粗壯，長跑不疲，不理贏輸，照博可也，可以減吓分㖭，人要健康，馬也要健康，官仔馬多跑就傷，減唔多分，好難贏頭馬啫。