阿董施政報告，將政務司司長曾蔭權擺上枱，政制發展叫佢慢慢「諮詢民意」。中環精英界竊竊私語，個個都話煲呔條命真係好苦，不過唔怕，齊齊卸畀中央，話中央有權有責咪得囉。煲呔一句「我係香港人，流香港嘅血」，天地動容，維港風雲失色，已經隱隱有梅艷芳告別演唱會嘅「夕陽之歌feel」。通常一個高官嘅對白，無喇喇講到咁激，好似葉劉當年咁，即是就快有以身殉職嘅意志。
梗係喇。若果政制發展嘅「諮詢」係堅嘅，即是回應民意訴求，二○○七年普選特首有鬆動，咁大嘅彩，點解阿董唔飛身爭位攞，自己兼任呢個所謂「基本法研究專責委員會」主席，指三道四，呼五喝六，贏盡掌聲，而要閃身讓畀阿當奴嚟做？
政制發展呢鋪牌，北京四大惡人已經打咗隻出嚟，呢圈係東風，阿董鬆得章畀煲呔嘅，就梗係唔會係隻「東」。所以曾司長噚日一上電台，即慘成箭靶，阿董借大陸把刀殺人嘅狡計得逞第一回合。為今之計，當奴面前有上中下三策：上策，就係以飛蛾撲火之志，同佢玩鋪假戲真做，真諮詢，向民意負責，一腳踩住廢董嘅V字膊，另一隻踩住佢個肥頭殼，直攀天庭，向胡溫曾痛陳大義，代表香港良心，大膽博一鋪，同姓三分親，話唔定講得服曾慶紅一個就夠，未必輸硬。
唔好唔記得阿當奴嘅銜頭，係爵士（Sir）。呢個勳銜，在國際間有高尚嘅地位，絕對唔係暴動首領楊光所佩戴嘅「大紫荊章」嗰隻等級。身為爵士，代表勇氣（Courage）同埋品格（Integrity），亦即肥彭喺最後一次施政報告所勉勵嘅：「寧為飛灰，不作浮塵」，最多劈炮唔撈，當奴好大福報，佢啲仔女，已經卓有成就，唔撈又有長俸，歸埋阿姐陣營，得閒潤吓阿董兩句，慢吓手另組中產黨拍住阿姐直選，就算乜都冇，百年之後，香港人亦一定會喺中環起座「曾公廟」紀念佢精。
中策，就係話畀港人知，自己不過係打工，政制發展最終係大陸揸晒權，你哋想鬧，可以鬧胡溫曾，唔好鬧煲呔曾。
下策，就係精忠報國，做葉劉嘅男人版，攬晒上身，博做第三屆欽點嘅特首。不過呢條路好渺茫，因為上有北京護法「四大」睇場，下有「雙英」（唐英年、梁振英）叮噹馬頭，加上左仔土共，昨日已經「壯志飢餐陳太肉」，今日更想「笑談渴飲當奴血」，枉拋心力，做賣港奸臣？睇怕我哋當奴唔會咁老襯。
阿董講得啱：辭職，係好容易嘅（好似鄧蓮如、陳方安生，逍遙自在，今日留得歷史英名），留低嘅，更難（堂堂政務司司長遭到阿董玩殘），人生自古誰無死，曾蔭權三個字，已經係香港僅剩嘅品牌，喺必要時，曾司長點樣取捨，全港市民都會支持佢。
跟阿董打工，長期俾佢吹脹，就係好易搞到咁燥。連官仔李國章，都喺立法會怒斥包括民建聯在內嘅政黨唔肯批教育撥款，為博政治選票。其實，亞瑟．李應該喺行政會議開會嗰陣，拍枱指住曾鈺成，然後對阿董話：「呢條友代表嘅政黨，喺出面反對緊政府，佢重有乜面坐喺處開會？一係佢執包袱滾出行政會議，一係我唔撈！」
唉，香港始終做過一百幾年殖民地，點都係缺少一啲熱血澎湃嘅維港男兒！
傳真︰2623-9278
電郵︰