小初前日先至講完天地數碼（500）有得炒，但走勢飄忽好難玩，隻股噚日立即勁升33.9%，以全日最高位1.58元收市，真係唔到你唔服。
經紀陳講笑話，炒家要拆小初招牌，所以隻股先至有咁嘅表現，不過股價雖然勁升，但尚未到達傳說中的目標價，至於會否到價，相信要等吓先知。
除咗天地數碼外，有隻股仔亦連升兩日，就係公司名好有氣勢嘅千禧智慧（724），呢兩日股價好似一支箭咁升，創出52周新高。經紀陳話，市場傳聞公司早排完成控股權易手之後，好似想在市場上配股集資。
千禧智慧噚日升27%，收0.61元，但成交股數只得180.6萬股，金額僅98萬大元，只係乾升而已。
經紀陳話，千禧智慧新股東早幾個月以每股0.34元買入控制權，同時進行全面收購，有關計劃剛於本月初完，新管理層亦正式入主，姑勿論配股消息真定假，隻股現價高過收購價好多，新大股東帳面已經勁賺。
慕容小初