個市欲跌還升，再漲多一日，今回由電訊股帶動，聯通（762）升10.6%，中移動（941）升4.9%，其他兩件中信電（728）與電盈（008）冇咁厲害，分別只添身價0.8%同1.9%。
打吓電盈Call輪主意，相信有搵銀機會。其他電訊股創新高，應可帶動電盈，而電盈本身落後大市頗多，亦有追落後概念。公司前景雖然唔係個個都話好，但短炒唔使顧慮得太多。
電盈Call輪，正路之選離唔開9791，收1.09元，微升1格。隻輪3月到期，溢價1.6%，槓桿率5倍。
博中電信跟住聯通與中移動向上移，諗吓中電信Call輪，對象有兩件，就係9910同9225。9910喺6月到期，輪價92仙，平水，槓桿率3.5倍。9225亦係6月到期，輪價73仙，溢價5.6%，槓桿率4.4倍。
國企指數再跌1%，但國企股好個別，指數跌係因為個別重磅國企偏軟。國企指數已連跌3日，再跌些少，可以吼吓啲國企（中企）指數Call輪。國企指數Call輪對象有9363與9364兩件，前者買賣多啲，炒上落好方便。國企指數Call輪超過20件，有啲數據唔錯，只惜交投太疏唔啱炒，有啲成交勁，但屬另類輪，散戶冇法子清楚啲實際數據，只啱真正專家或高手買賣。
章 盛