新車速報2：<br>萬事得Mazda3五門版樣靚實用

新車速報2：
萬事得Mazda3五門版樣靚實用

新年伊始，萬事得引入全新Mazda3車系嘅同時，同系另一款五門SportWagon亦同步登場。兩者比較下，呢部更具動感並帶出RV風味嘅SportWagon，同級車中可謂無與匹敵，既實用又多變嘅個性，好切合時下年輕一代車迷嘅要求㗎！
記者、攝影：陳偉林
ImageGirl：Cody

雖然五門掀背車款，並非本地市場嘅主流，惟近年RV熱潮方興未艾，加上大多五門車款式，予人有短少精悍又靈活嘅一面，因而不乏車迷捧場。

■特大鬼面罩匹配上一體式氣霸裝置，烘托有一份辛辣味。

■標準版備有原廠尾翼連High-mount煞車燈，貫徹有房跑車個性。





跑格鮮明又突出
若然你近距離留意下呢部Mazda3五門版，你會發覺佢整體線條，要來得更流暢及利落，四輪略見拋沙板設計，令得車體輪廓分明。較四門版為大嘅鬼面罩，匹配左右一對頗有神氣嘅雙圓大燈，以及一體式泵把連氣霸組合，還烘托有一種惡形惡相嘅跑車辛辣味。相比下，大幅面嘅獨立尾燈編排，跟車頭可有相呼應感外，高置尾定翼連High-mount煞車燈，加上尾泵把下嘅整流裝置，重貫徹出一部完美房跑車嘅氣息呢！

■代理特別換裝上一套17吋合金胎軨作測試，單係賣相經已攞滿分。

■尾泵把較扁平，加配整流器設計，跑意洋溢。

■三幅式真皮跑車軚環，左旁重備有音響遙控鍵。

■4前速Activematic半自動波，手排轉檔屬上減下加模式。

■表板旁備有DSC開關鍵，大可以自然反應克服跣胎問題。

■獨立3D表板設計，暖暖紅光透現悅目又見資料豐富。

個性鮮明座椅變化多
四門Mazda3座艙，以雙色調配襯和諧吸引，而眼前呢部五門版則用上單一色調環抱，格外烘托出一份跑車風采外，重予人豪邁有型之感㗎！前排一雙仿桶形真皮椅，剪裁貼身富承托力，駕駛席重另置有座墊高低調校。後排空間既闊落，重有獨立頭枕及中央手枕配備，遇有需要時，尾排椅背重可以作60:40獨立收摺，令容量倍增㖭！
原車標準裝備包括電窗、電鏡及電天窗外，重有一體化嘅原廠恒溫冷氣連6碟CD音響；再者，中控台頂端重備有行車電腦顯示，加上透過軚盤遙控音響鍵，以及左右兩旁嘅雨滴感應水撥同自動開關車燈推桿，設備可謂一應俱全。

■低腰線配搭，令尾廂上落物件，變得輕鬆自若。

■新車底盤結構滲入不少歐洲車元素，為近期較少見到一部高操控性嘅日本車。

主動式系統駕車更安心
新車跟四門版同樣用上一台1.5公升直4DOHC偈，以及全新4前速Activematic半自動波，筆者較側重以手排+/-推桿轉檔，感覺既順滑又靈敏，惟中段扭力表現較突出，若然能夠掌握轉數，起跑加速感會變得更強。
再者，響蜿蜒多彎嘅山路上馳騁，由於代理替換裝上17吋合金胎軨關係，胎面跟路面有較多接觸，表現既平穩又見循迹性高，若然猛然踏下油門於低檔內，立時DSC跟TCS系統會加入協調，令走彎變得暢順無比。難得一套高效能制動碟，匹配ABS連EBD組合，煞車幾乎沒有多大俯衝及後仰感呢！

■單一色調配搭嘅座艙，格外予人感受有濃厚跑車氣息。

■人體工學設計嘅座椅貼身富承托力，座墊重可以高低調校。

■尾地台下設有儲物匣，而尾排重可以收摺騰出更大空間。

■獨立前後房燈之間，備有隔熱電天窗。

■尾排椅背可左右獨立收摺，以便擺放較長物件用。

■雙層儲物匣容量不菲，可擺放較厚書籍。

■中控台設計講究，按鍵及旋鈕編排有序。

萬事得Mazda35dr.Premium規格
引擎：1498cc直4DOHC
馬力：114ps/6000rpm
扭力：14.3kgm/4500rpm
傳動：4前速Activematic半自動波，前輪驅動
懸掛：（前）麥花臣支柱（後）多連桿
制動：（前）透氣碟（後）碟式（ABS）
輪胎：195/65R15BridgestoneTuranzaER-50
尺碼：4420×1745×1465mm
軸距：2640mm；車重：1250kg
平均耗油：16.6km/L
新車售價：$153,500
車輛提供：萬事得汽車（27149105）

記者評語：Sportwagon形象惹人愛
新車重燃有1.5公升級SportWagon氣息，既富實用性又具房跑車色彩，加上一台1#.5公升S-VT引擎，匹配全新4前速Activematic半自動波箱，相信會吸引到時下一班年輕人所接受；設備既齊全重有上佳操控演繹，予人有內涵及好玩嘅個性。

Cody評語：設備齊全實用度高
一身至Sharp顏色好In又見吸引力，五門掀背設計重別具有跑車特色；想唔到個車廂咁豪華、設備又齊全，重給人有渾然一體嘅新觀感。遇有需要時尾排重可以放低，從而令尾廂空間倍增㗎！

安全系統特色逐個捉
3H車架穩紮可靠
全新萬事得Mazda3車系嘅車架設計，響各個主要支點有強化整固，遇有撞擊重會吸震潰縮，以減低直接傷害車內乘客嘅機會。

DSC加TCS係乜東東？
普遍只會出現於高級車系嘅主動式安全系統，DynamicStabilityControl（DSC）穩定控制裝置，連TractionControlSystem（TCS）循迹控制系統，尤其響濕滑路面，當個別車輪出現打滑及跣胎時，會有自行以制動器修正航道，不致有失控情況。