想揀部大尺寸嘅電視過新年，究竟應該買Plasma定係揀LCDTV呢？兩款電視背後都各有大廠支持，Plasma一向都被界定為畫質最靚，畫面最正，同時因為身價高昂成為身份象徵。Plasma近年售價都跌咗唔少，同一時間LCDTV挾住最新科技以挑戰Plasma嘅皇者地位，今日小記就走上影音店華仁會，搵專家分析現時戰況。
記者：許福合 攝影：陳盛臣
ImageGirl：Don 鳴謝：華仁會
唔少人鍾意Plasma，其中一個原因係貪佢夠薄，重可以學商場店舖裝上牆就更慳位。而現時技術上以Plasma較成熟，一般對比度及亮度都會較LCDTV高，睇出嚟會覺得畫面較Sharp，有更強立體感，而且同CRT電視一樣都係180度可視角度，唔使坐到正一正嚟睇，成班人齊齊睇碟唱K都啱用！因為機身已內置TV-Tuner，唔使再拖個箱仔就可以睇電視。售價方面，以同一尺寸相比，現時Plasma售價會比LCDTV平得多，差價由數千到上萬不等。而保養則約機價10至20%，即機價$30,000其每年保養需約$3,000至$6,000。
1.記住問清楚有冇內置TV-Tuner，否則要另購外置式TV-Box先可接收電視。
2.電視嘅光亮度如1,000:1等數值只可作參考，夠唔夠光需實地觀察一下。
3.圍住屏幕走動嚟睇畫面，太易變黑即係可視角度較低。
4.親身去比較唔同機嘅畫質分別，個人喜好比籠統睇規格表更靠得住。
5.一般廠商都只會保證新機唔多過3粒死點，購買時要問清楚。
6.Plasma一般都會包埋安裝或座枱安裝，而LCDTV就較少提供。
7.大部份Plasma同LCDTV都採用較具電影感嘅16:9屏幕，若以睇電視為主，可選擇傳統4:3屏幕。
8.超高解像度嘅電視數碼廣播制式（HDTV），香港起碼要到08年先有聲氣，心水型號兼容與否似乎無傷大雅。
9.部份電視具有更靚嘅DVI（數碼輸入）介面，若配合同樣具有DVI嘅錄影機、DVD機等裝置，畫質亦相應大幅提高。
10.不同品牌會有唔同保養年期及續保費用，價錢上落頗大，不妨多向店員查詢。
有人話LCDTV技術上仍未完全成熟，但講到壽命就比Plasma優勝，Plasma平均只係得20,000小時，以一日睇8粒鐘計，只得6年壽命，LCDTV就可以用足40,000小時，解像度亦比Plasma好，即睇高線數嘅DVD會較好，若睇較低解像度嘅電視節目則以Plasma較佳。不過LCDTV亦有要改進地方，例如灰度較低，黑色表達唔夠「實」，畫面幼滑得嚟唔夠Sharp，光位會有化開嘅情況。保養費用較低亦係唔少用家選擇LCDTV嘅原因之一，續保費用會比Plasma平1、2千蚊，長遠計慳唔少。
睇完買機Tips，以下為搵嚟店長推薦各兩部Plasma同LCDTV，各有特色，不妨作個買機參考。
日立CrystalFace系列42PD50000TA，螢幕尺寸為42吋，而且光度充足，達到1,100cd/m2，配合1,000:1對比度，畫面絕對一流。機身已內置TV-Tuner，直接就可收看電視節目，亦支援數碼廣播及DVI輸入。
SHARP最新推出嘅AQUOSLC-37AA1H規格都算唔錯，使用防反光螢幕，亮度達430cd/m2，而對比度亦有800：1，另外更特別着重音效，內置1Bit擴音揚聲系統，提供ProLogicII及SRS等環迴音效。
華仁會
查詢電話：23980280
地址：旺角花園街75-77號花園商業大廈6樓