赤柱富豪海灣最近賣得幾好，呢類幾千萬嘅豪宅，代理要送嘅優惠，都有番咁上下貴氣。中原即日起至猴年正月元宵，頭十個買家可獲贈兩圍豪門夜宴，菜式有金箔二十頭鮑魚、魚翅、焗龍蝦同蘇眉，每圍要二萬五千蚊，年近歲晚，買完樓重可以同親友食番餐豐富嘅團年飯。
富豪酒店執行董事范統話，雖然今個星期二先至同記者朋友見過面，但係短短三日，富豪海灣都賣咗三間屋，其中B3號屋喺噚日上晝成交，成交價三千一百八十萬元，呢個買家之前已經買咗B5號屋。另外，之前一口氣買咗四間屋嘅本地投資者，重諗住買多一間投資。
范統話，富豪海灣已經賣咗四十幾間，呎價近九千蚊，由於有部份會保留收租，可出售嘅就淨番六間，農曆新年之後，就會加價半成。
長江實業個紅磡國際都會寫字樓、酒店同商場，聽講寫字樓已經租出晒，酒店入住率都唔錯，惟獨商場出租率就認真一般，所以長實不斷諗計想搞旺佢，例如旗下唔少樓盤示範單位同售樓處都擺喺嗰度。
長實眼見內地樓盤喺香港都幾好賣，除深圳外，過去年幾，內地大城市好似北京、上海同重慶等都有唔少樓盤攞嚟香港搞展銷。
既然商場喺正紅磡火車站隔籬，食正中港兩地走條水，聽聞長實構思緊將商場變身做內地樓盤在港長期展銷廳。當然，場內展銷嘅香港樓盤依然只得長和系一家。
重有唔夠兩個星期就係農曆新年，又到各大商場展開新春宣傳攻勢，馬鞍山新港城中心重點針對自由行旅客，十六至十九號，凡國內客在商場消費，憑即日正本發票，同埋國內旅客證件，即可免費換取精美禮品同埋利是封。
至於香港人都有優惠，指定期內購物滿四百蚊，就可以獲贈賀歲片「鬼馬狂想曲」戲票或者歌星許志安最新大碟。
新港城中心嘅農曆新年裝飾同埋推廣節目，一共用咗一百五十萬，打頭炮節目係十號嘅「新港城中心鬼馬狂想曲狂想Show」，戲中主要演員古天樂、劉青雲、吳鎮宇等均會到場。
樓市係咪真係轉角就見仁見智，但唔少地產界猛人就相繼入市。九龍倉助理董事黃光耀就一鎚敲定，用咗八百萬買何文田君頤峰第九座一千七百九十四呎三房單位。
聽聞，黃生入市之前搵過風水師睇過單位坐向，大師教路單位向西南見水就最理想，唔怪之得黃先生咁識揀，買咗個望內園兼睇到泳池嘅單位，符合晒風水師要求。呢個豪宅盤九倉都有份發展，今次幫襯番自己公司，果然投下信心票。不過，黃先生就話，等收樓後至決定自住定出租。
另外，噚日有個落選港姐用六百萬買入尖沙嘴擎天半島第二座一千一百呎單位。
雖然老董繼續成為箭靶，俾人鬧到眼濕濕，但係近排香港個市好番確係不爭嘅事實。適逢長假期，消費同旅遊行業暢旺，舖租樓價都借勢反彈，投資者掃貨愈見重手，唔少海外買家都心郁郁。
打國際牌嘅世紀21地產，香港區總經理鄧慶年話，集團喺美加、東南亞、中東嘅區域總裁，都打算嚟香港視察，最快三月份到港嘅係世紀21巴基斯坦區域總裁，到時重會同各大發展商會面。
太古地產最近想將西半山雍景臺前面一堆舊樓，重建為一幢五十層高嘅住宅，遭到附近街坊群起反對，佢哋最擔心係區內交通負荷已好嚴重，二十年嚟又冇做路面擴闊改善，再起咁多高樓大廈，半山交通會大擠塞。
有區議員之前已經同居民代表約見港島規劃專員凌嘉勤，表達不滿同抗議政府諮詢草率。同時更發起「一人一信」行動，收集到四百一十八份反對回條。
蘭西
電郵地址：
