𠵱家科技日新月異，連帶汽車代理搞新車預展，都來得有瞄頭噃！事關昨日豐田代理皇冠車行，替新款豪華七人MPV嘅Alphard搞LaunchingParty，唔單止星光熠熠衣香鬢影，有關方面重搞搞新意思，以同步方式連同香港、九龍及新界共六個陳列室，同步推出新車，真係令亞Mark大開眼界，同時重感受到代理方面對部車係幾咁重視㖭！
由於代理未引入Alphard前，本地有關嘅汽車平衡進口商，經已早一步將之引入市場，而且佢重係一款長賣長有、不乏捧場客嘅車款，突然話代理引進Alpahrd香港版，登時令唔少行內人感到愕然呢！亞Mark響酒會上，竟然罕有地碰到唔少汽車入口商行家，睇嚟佢哋都係想攞Alphard嘅第一手資料，正所謂知己知彼嘛！當代理宣稱新車開售價，Alpahrd動感V版只售39萬9千，而頂級豪華G版，亦不過44萬9千嘅時候，真係令唔少人嘩然㗎！皆因兩車設備幾近頂級齊全之餘，更有雙電趟門、電子避震、前後獨立恒溫冷氣等組合，惟車價竟較水貨車便宜，呢招迅雷不及掩耳，加埋薄利多銷嘅策略，又難怪代理對新車咁胸有成竹啦！