大市升勢持續，但市勢都幾反覆，曾升過100點，亦跌過90多點，收市13203，升45點，但期指就低水，大市已連升9日，投資者態度已變得較為審慎。
不過，由於香港真係水浸，而且日日都有新水到，港股升後無疑會出現調整，市況在高位亦會轉為反覆，但新水一路入市，大市調整完之後，依然會繼續向高位進發。
到目前為止，基金重係睇好後市，恒指在農曆新年前後，有機會見14000，早輪趁高沽咗貨者，要吼機會買番，賺多一轉。
國企連續第3日下跌，但噚日跌幅已收窄，下跌唔夠1%，個別且已逆市而上。中石油（857）仍受傳言困擾，中段曾一度跌到4.125元，但低位已見有大盤承接，結果回升上4.275元收市，跌0.15元，成交更大增到5.9億股，總值25億元，係上市以來最高紀錄。
5大之中，中國電信（728）同華能國際（902）已止跌回升，前者升1個位，後者升0.25元。至於第2大的中石化（386），由低位3.2元掃到3.3元收市，調整亦好大機會已完成。
去年11月21日，中石化低位2.125元，近日升上3.9元，上升1.775元，若調整升幅的0.382，可見3.22元；另外，若計去年12月17日，中石化由2.575元起步，則到3.9元，共上升1.325元，若調整升幅一半，可見3.23元。
中石化噚日低見3.2元，剛好完成調整目標便反彈，今日若回升，可確認到底，初步目標係3.9元。
雖然油股近期累積升幅頗大，但調整後又恢復吸引力，由於基金仍會買住幾隻國企大成份股，而佢哋亦有信心，油股在現水平仍有機會翻半番，以中石化為例，股價有機會見到5字頭，有消息指多家大行短期內會提升油股的目標價。
滙豐證券最新的研究報告指出，中石化受惠煉油毛利提升，加上化工產品需求增長帶動，中石化股價仍可看好，建議投資者吸納，目標價調升到4元水平。
東強電子（615）噚日高收1.22元，升4.2%，且錄得大成交1300多萬股，確認突破大圓底形態，升幅有2至3成，可留意。
郭兆誠