長實東涌映灣園又有新宣傳伎倆，以連鎖店形式設銷售站，每個站都搭建示範單位畀市民參觀，打破傳統新盤只在指定地點建示範單位。長實今次特別針對東鐵沿線嘅換樓客，喺紅磡都會商場同稍後開幕嘅沙田銷售站都屬於東鐵大站，希望可以吸引一批日常搭東鐵出入嘅市民，順道參觀樓盤。
另外重印咗二十五萬份有關映灣園會所同東涌規劃嘅小冊子，免費派畀東鐵沿線居民，呢批印刷精美嘅宣傳單張，落足本錢同心機去做，單張圖畫設計卡通化，有啲似細個玩嘅康樂棋，務求接到單張嘅市民，有興趣打開睇睇，收宣傳之效。
至於銷售站裏面嘅示範單位，面積只有七百幾呎，竟然耗資一百二十萬去裝修，費用相等於該單位八成嘅樓價，都算誇張。
南豐去年賣樓成績十分好，喺發展商銷售榜上排第三，中原噚日趁翠豐臺記者會，送咗套國際象棋畀地產部經理麥一擎，寓意佢運籌帷幄，舊年賣樓出招準繩，調兵遣將都掌握得好，所以旗下新盤銷情咁好，其中將軍澳廣場更加係舊年新盤銷售之冠。中原話，希望麥一擎今年繼續咁出色，可以再創高峯。
今次中原準備嘅國際象棋，好有中國特色，棋子造型好特別，有中國士兵，同埋皇帝皇后，手工精緻，就算唔識捉棋，都可以作為擺設。
尖沙嘴凱悅酒店全球招標，相當矚目，噚日十二點截止入標，蘭西有去趁熱鬧，唔少財團係最後一個鐘先嚟落標。大約十一點十五分終於見到第一個財團代表，佢手執公文袋，準備放入投標箱，但係個箱入口太細，根本放唔落份標書，擾攘咗差唔多十五分鐘，第二個落標財團華置代表嚟到，問題都未解決，最後要拆開個箱，先可以放得入啲標書！
事件並未因此獲得解決，事關拆箱過程喺辦公室內進行，之後又冇搬番個箱出嚟，搞到後尾嚟落標嘅財團代表，搵勻都唔見個箱，搞到要在場記者們提水。其後，負責招標嘅律師行，都係要將個箱擺番喺接待處當眼位置，搬嚟搬去，真係好唔得閒。
噚日除咗係政府公布施政報告嘅重要日子外，重係中原地產執行董事陳永傑嘅牛一，中原一班管理層同後勤同事，五十幾人前晚同陳董慶祝生日。
生日禮物包括名貴領呔及自製生日卡，重有一本載有路斯（陳的暱稱）同夥計們一齊並肩作戰嘅相片。到場嘅女同事重送上鮮花，路斯開心到成晚合唔埋口。路斯話，生日願望就係中原住宅部今年收十三億五佣金。
地產界個個都話個市起緊，真係有唔少人信到十足，有啲入市心切嘅買家，唔理價錢是否合理都要搶住買。
噚日，蘭西收到一份成交資料，講話沙田第一城十五座高層B室，面積九百八十呎，成交價去到三百萬，呎價三千零六十一元，幾乎貴過西九龍新樓盤個價。美聯鍾燕河解畫，同類型大單位盤源少，物以罕為貴，加上千金難買心頭好，所以買家貴啲都願畀。原業主半年賺八十五萬，真係賺到笑。
蘭西
電郵地址：
