民建聯早排玩嘢，加入民主派陣營拒絕通過撥款，搞到八大校長媽聲四起，煲呔噚日忍唔住口，立法會開會前，喺議事堂內行去馬丁、楊森、李華明同埋涂謹申旁邊，好寸咁話：「好咯，由今日開始，香港多咗八間私立大學，班同事又多百幾億使。」
一聽就知煲呔講反話，不過佢老哥唔高興，大家都冇辦法，個遊戲規則係咁，民建聯要顯示實力，唔肯再無條件保皇，你都吹佢唔脹。
煲呔見各人冇反應，竟然加多句，「下次你哋唔叩頭，我唔會再返嚟申請撥款。」
講到咁，阿涂（圖）終於頂唔住頸，話要同煲呔勾手指尾作實，煲呔其實都係講吓啫，梗係唔肯勾啦，點知阿涂話𠝹手滴血都重得，呢個時候，煲呔見攞唔到威，惟有即刻乖乖返埋位坐低嘞。
大學撥款變得咁政治化，民主派都要小心玩火。
傳真︰2623-9278
電郵︰