港股升勢持續，市場消息就滿天飛，繼中國鋁業（2600）成功大手批股後，又傳出好多大公司同策略性股東亦心郁郁，事實上，個市升咗咁多，股價升到咁高水平，確實令人心動。
中鋁批新股，未沽得，但好多人可以做套戥，不過，噚日嘅沽壓唔大，證明實力揸家重係好睇好後市。中鋁低開5.85元後，行情好快就抽番上去，最高重去到6.7元，又創出新高，收6.35元，仍升0.2元。家吓香港水浸到上眼眉，大公司伸手集資，對基金而言，正中下懷，短期內即使再嚟多幾次中型「晒士」嘅「披成」，對大市都唔應該有太大影響。
國企第2日調整，國指跌103點，成交則大增到66億元，獲利沽盤雖多，但一樣有大盤硬接。中石油（857）好大波動，收4.425元，跌2.7%，傳原始策略性股東心足，想沽貨，但只要有人要，整固完之後，又會再升過。
納米兄弟噚日齊齊發威，佑威（627）升6.7%，金威（910）升5.3%，呢一兩個月，好多有實力而落後的二三線股，都會接力而上，除兩隻威外，彩星（635）似已見底，短線阻力在1.4元，若升破，則升浪確認。另一隻要留意嘅係東強（615），大圓底收集已近尾聲，圖表亦已出現入貨訊號，一衝破1.22元阻力，目標指向1.5元。
彩星同東強都係基金股，只要一發力，應該會幾「好肉」。另一隻基金近日買得好積極嘅係大酒店（045），聽聞大行會陸續有報告推介，目標價起碼見6字頭。大酒店前日抽高成3毫子，噚日在4.8元至4.9元的高位整固，去年10月做配股時，股價在5.4元至5.0元間有一個大型下跌裂口，基金既然買得咁急，相信呢個裂口好快會補回。
地產股呢輪起咗咁多，但大酒店未郁過，大落後，集團揸住嘅，全部都係優質物業，呢半年來升值唔少。配股後，每股資產淨值攤薄到9元，家吓保守估計起碼有10.7元，股價重係大折讓55%！
去年10月，做過披成嘅大公司，有恒地（012）同新世界（017），前者股價已比披成價升19%，後者更升33%，大酒店呢？仍在披成價（4.9元）之下。
郭兆誠