今屆北美國際車展所展出嘅新車款甚多，除昨日我哋介紹過嘅日產InfinitiQX56惹人注目外，全新凌志GS系列及新版積架S-Type亦具有一份誘人魅力；不如𠵱家一齊嚟睇吓，佢哋有何吸引力啦！
甚受車迷歡迎嘅凌志GS系列，廠方喺今屆車展會場上，就展出咗新一代型號；新車除賣相突出吸引之餘，加上圓潤車身線條，襯以四輪18吋大型跑車合金胎軨，從中更顯現出一份跑車應有嘅辛辣味。車廂鋪排亦經過重新設計，空間寬敞闊落唔在講，設備配搭又見齊全易用；廠方更會為新車增設附有AFS功能嘅頭燈、KeylessGo系統，以及輪胎氣壓監察裝置等配備㖭！
機械配搭方面，屬入門版嘅GS300型號，會採用一台3.0公升V6偈（馬力245匹）作核心，而頂級GS430型號，更會用上一台能輸出300匹馬力嘅4.3公升V8偈，性能表現可謂毋庸置疑；然而，新車更會加入一套全新嘅VDM系統，可有助增強行車穩定性呢！
同樣廣受車迷歡迎嘅積架S-Type，廠方亦於會場上展出新款型號，新車嘅改變着重響外觀方面，務求予人有豪華氣派之感；
先從外形而言，雖然看似沒有多大改動，但新設計嘅頭泵把及曾略作改動嘅鬼面罩，除能令車首造型望落更具吸引力之餘，原來頭冚更改用上鋁質物料製造，較原來嘅鋼質物料來得更輕，可有助改善車重分布；車廂布局亦具有一定吸引力，設備齊全唔在講，其中頂級S-TypeR嘅車廂鋪排，更顯現出一份跑意呢！
至於機械配搭，則會與現有型號相近，並無太大嘅變動，依舊以一台2.5公升V6引擎作主打，另外又備有3.0V6，以及頂級S-TypeR跑版所配用嘅4.2公升V8Supercharged型號。