八方較早時披露，港交所前行政總裁鄺其志出任新昌集團要員，噚日睇聯交所資料，鄺神童啱啱申報，已經持有七十三萬餘股新昌營造股份。鄺神童嘅新工剛於一月一日生效，隨即申報持有股份，似乎呢批貨係握手禮。
如以新昌營造市價計算，上述股份值二十八萬餘元，同電盈主席李澤楷每次聘任要員嘅握手禮相距好遠，即如係神童眼中釘嘅馬時亨，雖然文件都懶睇，累死神童，但小小超都醒咗二千萬元電盈股份過佢。不過，各處鄉村各處例，同人都唔同命，唔代表鄺神童嘅身價嘅。
𠵱家，鄺神童係新昌營造間母公司「新昌國際」董事總經理，以及新昌營造主席葉維義及新昌管理副主席葉儀皓兩兄妹嘅替代董事，即係做兩間上市公司嘅高層替身，可以主持董事局會議。
（圖）鄺神童一月一日返新工，即獲贈七十三萬餘股新昌營造股份。
傳真︰2623-9278
電郵︰