香港嘅銅鑼灣區，可算係世界名牌及名店嘅集中地，而身處當中心臟地帶嘅平治旗艦店Showroom，亦隨着原有嘉蘭中心易名為利園2期後，由原來舊址嘅利園，移師咗去對面嘅2期新舖，而且重係兩層複式設計，單睇建築面積已有成近萬平方尺，大到可以同時擺放十一部不同類型嘅平治車款外，既有前線人員嘅辦公地方，兼且重有一層專售平治精品嘅陳列室，若然亞Mark無睇錯的話，相信會係現存香港至大嘅汽車陳列室喇！
至於同屬仁孚行旗下嘅韓國現代汽車，位處九龍長沙灣嘅全新維修中心，相信可趕及響農曆年前竣工投入服務，惟暫時闢作現代Showroom嘅位置，相信仍會用上一段時間，皆因亞Mark聽聞新公司仍未物色到好舖嘅關係，想搬大舖嘅可能性，自然就要耐心多等一會喇！