元旦剛過，飯局好多。八方噚日出席一個春茗，係由數碼通作東，宴請新聞界朋友。但呢次與其他春茗飯局不同，講嘅內容除佢哋自己公司嘅業務外，同其他電訊公司都好有關係。
數碼通總裁黎大鈞雖然話以今年發展前景為題，但內容其實主要係批評其他行家喺發展流動數據傳輸服務（MMS）方面唔夠方便，搞到啲用家有時都幾㷫吓。佢重即場示範數碼通同其他三個網絡商點傳MMS，乘機勁抦行家。
聽講，數碼通除咗請老編食飯時抦人之外，朝早見分析員同下午見前線記者，都一樣好似好憤恨咁話人哋唔掂㖭。
冇錯，八方都知香港發展MMS嘅滲透率較其他地方慢，原因同市場推廣唔多唔少都有關係，不過，數碼通用呢招勁踩同行，喺外國就稀疏平常，喺中國人圈子就好少喇，今次數碼通點着火頭，睇嚟遲吓會有更多嘢聽嘞。
傳真︰2623-9278
電郵︰