老董喺立法會宣讀佢第七份施政報告，人人都估到唔慌會有驚喜，但都想睇吓佢點拆元旦十萬人大遊行同埋7.1五十萬人上街兩個大炸彈。
點知老董今次再次失憶兼眼盲，竟然可以當元旦大遊行好似八萬五一樣唔存在，一句唔提，佢話星期六係最後衝刺，只係改吓啲字眼，內容就一早寫好晒。
不過，話趕唔切將1.1加入報告都算啦，點都應該提吓港人對加快民主嘅訴求啩，點知八方聽晒佢發言，睇晒本書，都搵唔到「民主」呢兩個字！連呢兩個字都唔提，唔怪得有記者問佢，又話要用盡辦法拉近同市民嘅距離，咁報告嘅題目點解唔用《推動民主施政》而用《推動「民本」施政》呢？老董再次卸膊，話個題目係中央政策組建議嘅，原來乜嘢都唔關佢事，只不過劉兆佳寫作董建華背誦啫。
除咗冇民主，老董亦絕口不提區議會選舉，亦冇提《基本法》23條，葉劉當日壯烈犧牲，今日無色、無聲、無臭，事如春夢了無痕，真係死得唔抵。
傳真︰2623-9278
電郵︰