由公仔箱開始紅到去大銀幕嘅珍妮花雅麗絲頓（JenniferAniston），完成《老友記》之後就正式告別電視圈，全力向影壇發展。繼舊年佢拍住占基利（JimCarrey）嘅《衰鬼上帝》大收旺場之後，嚟緊上映嘅新片《情場算死草》，珍妮花繼續食住喜劇條水，同另一個笑匠賓史迪拿（BenStiller）扮演鬼馬情侶。
同樣由做電視再晉身影壇嘅賓佬，近年拍過唔少受歡迎嘅喜劇，好似《非常外父揀女婿》同《非常索凸務》咁，而今次部新片嘅導演，咁啱又係呢兩部戲嘅編劇，合作自然駕輕就熟。不過我大口羅拉睇番套片，就有啲似曾相識，令我諗番起賓佬嘅代表作《情迷索瑪莉》。
其實同樣係愛情喜劇嘅《情場算死草》，係講賓佬飾演一個好怕冒險嘅人，佢一心以為搵到個好老婆，點知佢老婆喺度蜜月嗰陣就搭上咗個潛水教練，好鬼失落嘅賓佬後來想同珍妮花飾演嘅舊朋友Polly發展，但又驚受傷害，咁喺追女期間自然搞出唔少笑料啦。
另外，唔使再拍《老友記》嘅珍妮花，話自己等做媽咪等咗好耐，以前成日拍劇就唔到時間，但係今年完全唔同，佢計劃好同老公畢彼特（BradPitt）生BB，重話起碼要等到BB一歲先再拍番戲。