三十六歲嘅巴治奧日前喺意甲聯賽省入兩球，帶領布雷西亞擊敗錫耶納，重差兩球，個人喺意甲聯賽入球就會到達二百大關，呢位老將嘅表現即時引起好多迴響。
巴治奧入兩球後，賽後好多支持佢嘅球迷喺網上表態，重準備聯名要求意足總畀佢入選國家隊㖭，不過唔係踢歐洲國家盃決賽周，而係雅典奧運會，等佢喺退休前執番個獎牌。其實，巴治奧喺日前比賽時，得到好多布雷西亞球迷支持，賽後更因為球迷表現而感動，令佢可能改變初衷，唔退休住。我求大俠支持佢踢奧運之餘，當然想佢延遲退休，始終「小馬尾」唔單止球技出眾，個份魅力，現今球壇中所剩無幾，延遲退休對球迷真係天大喜訊。
早前傳退休冇耐嘅「獅子頭」華達拉馬會再戰球壇，但呢位哥倫比亞名將近日否認復出，指傳媒亂咁吹水，搞到佢再次成為追訪焦點。當有消息話華達拉馬復出嗰陣，我求大俠都已經質疑，尤其是傳李華度去沙地踢波，最後就喺高士路落腳，有時真係俾流料搞到頭都亂晒！
李奧費迪南禁藥事件，要遲吓先有定案，以一向做法，球會都因為球員呢類行為而罰佢錢，但曼聯方面就表明唔會罰錢，唔使李奧有金錢上損失。
其實，曼聯一開始就撐李奧，重同國際足協反面，所以又點會到呢一刻先至罰錢，咪盞自打嘴巴。
AC米蘭日前打破羅馬今季不敗之身，上半季表現被猛烈批評之荷蘭中場施多夫，突然剪短髮，換個新裝後，同古華特個髮型差唔多。果然，對羅馬時表現同上半季時完全兩個人，無晒長髮，一樣「髮力」無邊。農曆年就到，怕且我求大俠都要效法施多夫，剪個靚髮轉運。
老牌歌星艾頓莊雖已冇做屈福特主席，但佢對屈福特有情有義，知道球會抵押咗域卡維治路主場套現後想贖番，佢特別捐出十五萬鎊真唔話得。其實屈福特同車路士踢足總盃第三圈，穩袋四十萬鎊，重賽雖然作客但晉級會搵多三十五萬鎊，睇吓屈福特會唔會為錢打高幾皮？