話阿董老懵，有時又好唔公道，因為老人家有時精到甩辮，好似所謂施政報告裏面關於政制發展部份，阿董就表演咗一招「移形換影閃身術」，閃身藝術級數之高，都咪話唔令人喝采。
當全港市民等住佢點樣講二○○七年普選特首問題，北京四大惡人一招獅吼，阿董一閃，跟住推咗個曾蔭權上前，叫佢做「基本法研究專責委員會」，就二○○七年普選特首及○八年立法會全直選，慢慢研究研究。
現成已經有咗一個「基本法委員會」，成員包括譚惠珠、陳弘毅，使乜又整多個「專責委員會」嚟研究政制？呢，呢一招就係阿董懵唔晒嘅所在嘞。佢一嘢閃開，將曾蔭權推上前。可憐煲呔重喺度揸住支掃把，說時遲那時快，已經俾阿董暗鬆一肘，曾蔭權大嗌一聲，一腳已經踩咗落預先布好嘅機關！
煲呔做咗呢個位，若果佢承認民意，膽粗粗咁搞真正嘅民意諮詢，宣布港人民意主流就係○七年要普選特首，跟住重儍儍哋咁揸住啲民意上北京游說，咁佢就會變咗第二個陳方安生，遭到廖暉當面省屁嘅人生最大屈辱，更被中方視為民主派代言人，唔止下屆特首唔使諗，重可能要即時執包袱㖭！
好嘞，若然唔係，煲呔聽話知碇，話頭醒尾，知道所謂諮詢，只不過係做吓戲，搏命叫土共、維園阿伯、民建聯魚翅宴北角選民集團，嗌大聲啲，交多啲印刷內容劃一嘅「意見書」，跟住向全港市民宣布：諮詢結果，就係雖然有少數嘅市民，支持○七普選特首，不過有更多嘅市民，持相反意見，認為都係要保持社會穩定好啲，飯票好過選票，吮奶嘴好過普吮特首，並歸納埋中央意見，都係喺二○四六年之後普選特首，較為符合特區利益。
若然係咁，煲呔佢就成為出賣香港民意嘅千古罪人，將會背負污名，陪埋阿董，兩個手拖手咁名載港奸賣港嘅史冊。
為怕煲呔唔肯完全就範，再加多一件林公公睇實。不過，林公公亦唔儍，佢喺記者會亦吐苦水，話本來去年底就開始諮詢嘞，不過十二月就發生咗一啲「變化」，就係中央突然表態，話凡親香港政制問題嘅「原則」同「程序」，都要先同中方諮詢。咁林公公又將個波，掟咗上大陸，即是話：呢件事，其實係阿爺揸晒權，佢話得就得，話唔得就唔得。
咁都重嫌未夠安全，阿董再指示光頭波出嚟講：政制改革好複雜，諮詢大大話話要三年。既然係咁，重「諮詢」啲乜？不如直接由胡溫兩個，一個着套軍裝，一個放把槍喺枱面，今日宣布：二○○七想普選特首？冇得傾！
傳真︰2623-9278
電郵︰