新年後，老友第一次聚頭食午飯，追數王竟然帶來兩支紅酒，話請大家飲一杯，祝賀經濟繁榮，大家好景，再搵多啲。秘書長飲咗一杯，竟然贈興咁話：「喂，追數王，我哋好景，經濟好景，你哋追數呢一行就冇景囉噃。」
追數王不慌不忙咁答：「唔係噃，大家荷包腫脹，我哋追數就更易，以前追極都冇錢還，現在打兩個電話，啲債仔就立即清還八九成，因為（一）佢哋有良心，以前冇水就避得就避，現在有水就做番上等人，有借有還；（二）發財立品，炒股炒樓翻身之後，唔想拖住條舊數俾人唱；（三）有番份正常工作，固定收入，最驚新老闆知道佢俾人追緊舊數。所以囉喎，經濟好，我哋追數好易做，佣金都收多啲。」
佢講得未嘗無理，經濟好之時，好多消失嘅蹤影都會突然現身。左丁山醒起一位幾年前神神秘秘嘅人物，喺今年區議會選舉之時，赫然出現在候選人名單之中㖭。追數王話：「選民名冊係公開資料，有埋姓名住址，候選人都有一隻磁碟，知道晒。十八區都派人競選嘅政黨，理論上有齊全港選民嘅名單。名單係公開資料，但只限於作競選用途，用在其他方面，係犯法嘅。」左丁山又唔明嘞，睇完選舉名冊之後，知道阿水住喺邊度，心中記住，三四個月之後去搵佢，警察憑乜嘢嚟拉人？特區政府無異於掩耳盜鈴，假惺惺而已。