歌手陳奕迅（Eason）父親陳裘大日前已經被判入獄，雖然Eason心情惡劣，不過佢都努力接片約𢱑銀，諗住為佢爹哋上訴，心事重重嘅Eason前晚同佢女友徐濠縈去咗一間寵物店，當佢喺店中玩狗時，先重見Eason嘅歡顏。
Eason前晚九點幾，同徐濠縈一齊喺銅鑼灣出現，佢哋上咗保母車之後，就去咗跑馬地嘅「阿貓阿狗寵物店」。Eason同女友一行入寵物店，就即刻有職員抱咗三隻小狗出嚟，嗰三隻狗仔好得意，隻隻白雪雪，好似毛公仔一樣咁可愛。
唔知係咪因為Eason呢輪頻頻撲撲，所以佢就將啲狗仔放喺寵物店寄養，前晚Eason攞番啲狗仔，不知幾咁開心，重情不自禁踎喺地上玩狗，就連好cool嘅徐濠縈，都攬住啲小狗不停咁咀，表現得好似好有愛心，佢哋玩狗玩咗十幾分鐘，最後至各自手抱愛犬上車，一家五口一齊返屋企。
噚日又有報道話Eason為咗救父，所以會食回頭草，以二千五百萬續約英皇四年，而馮仁昭亦有聽聞英皇以幫Eason付所有律師費作為條件之一，游說佢續約，但Eason所屬嘅MusicPlus唱片公司高層甘菁菁，噚日就強調到目前為止都未同Eason傾過續約問題，雖然公司好希望Eason可以留低，但都想喺Eason比較舒服嘅情況下同佢傾約，同時Eason亦冇叫公司幫忙支付律師費。
而Eason聽日就會開工，佢同王菲會喺聽日飛去上海，為晚上喺上海大舞台舉行嘅《第十屆ChannelV全球華語音樂榜中榜》擔任表演嘉賓。
韓國天后李孝利噚日喺韓國舉行簽約儀式，宣布加盟英皇，佢將會同容祖兒合唱韓文、英文同國語嘅新歌，一切仍在籌備中，新歌重會預計以三百萬做MV嘅製作費。英皇又用咗一百萬美金（約七百八十萬港元）同佢簽咗兩部電影合約，其中會同成龍合作。李孝利重話對呢次跨國合作好有信心㖭。
李我喺梅艷芳病逝之後，有感而發寫咗一首詩：「梅花冬盡謝紅塵，娘子仙姬幻化身，艷影歌聲千載住，芳菲不滅永留痕。」
李我噚日接受電話訪問時就話：「我同梅艷芳識咗好耐，當時佢只有七、八歲，喺廟街唱歌，佢個歌唱老師張雪係我好朋友，所以大家就係咁認識，我覺得梅艷芳藝術成就值得表揚，所以有感而發作咗呢首詩。」
杜德偉同梅艷芳相識多年，噚日佢喺上海準備為今日舉行嘅ChannelV音樂頒獎禮做嘉賓，被問到阿梅逝世嘅感受時，佢話：「好難過，我最後見阿梅已係大半年前。記得我第一次巡迴演出係同阿梅一齊，好難忘。」
早前新浪網搞咗一個「新浪網樂壇民意指數」，近日收到唔少投訴，指歌迷以電腦程式造假票，有網友重喺台灣網站教孫燕姿嘅歌迷以電腦程式影響投票結果。經過調查後，網站已經喺噚日開始陸續將假票剔除。雖然發現有歌迷喺一個鐘頭內為梅艷芳做出四萬幾票，但剔除咗之後，阿梅仍然列入最正面藝人第一位。
