市場對施政報告有乜期望，港股全日在13100-13200水平反覆，恒指收報13157，升121點，全日成交高達261億元。
有芬佬話，佢唔關心阿董講乜，反而好留意大學撥款政治化，如果議員繼續胡亂反對弱勢政府的合理議案，呢樣唔減得，嗰樣唔減得，財赤真係好難消滅。呢個世界上，有邊個政府可以承諾以後不減撥款？有都係呃人啦。基本法承諾公務員薪酬待遇不差於回歸前，已經係一大笑話，唔通議員要迫政府繼續講呢類笑話？
中國鋁業（2600）果然有料到，跌至5.85元後即急速反彈，由低位抽高14.5%至6.70元，夾到空軍一頸血。中鋁上午沽空高達1.71億元，下午空軍知驚，沽空只有5600萬元，全日2.27億元。中鋁最後收報6.35元，升3.2%，成交10.5億元。
不過，中石化（386）同中石油（857）繼續插水，分別跌5%及2.7%，拖累國企指數續跌。市場傳出兩隻石油股可能配股，係真唔係呀？
黑客話，有一路奇兵不容忽視，就是轉型投資墓園嘅瀋陽公用（747），將動用5.3億元購入深圳西麗報恩福地墓園66.5%，作為踏出轉型第一步。消息一出，股價急升18%至1.18元。香港都有呢類公司，但就從未有上市，據聞是因為死人錢易搵，唔知國內的死人錢是否一樣咁易搵？
瀋陽公用決心轉型，相信日後重有好多動作，不妨列入注意名單。
阿 虎