煲呔接咗個炸彈搞政改，隨時中咗蘇民峰支卦，同葉劉一樣，要劈炮收場。
財司唐唐就好運得多，只係重組合併幾個委員會，嗌一句改善營商環境，同埋領導一個乜嘢「協調發展大嶼山經建項目」嘅專責委員會，口號愈抽象愈穩陣。
唐唐條命正過曾氏兄弟，唔恨得咁多。不過，佢入住新屋嘅時間就有啲延遲。原本佢哋以為財司府邸嘅工程聖誕前完工，因為阿松入住前都做過吓裝修，點知後嚟先發現間屋嘅電線同水喉都唔掂，要換過晒，估唔到官邸都會殘舊成好似李鄭屋邨咁，唔怪得之前唐媽媽嫌三嫌四唔想個仔搬入去啦。
照𠵱家情況睇嚟，要搞到呢個禮拜尾先至做得完，至於幾時搬入去住，就要等完晒工先決定，擇日搬屋，至於裝修費幾多唔知鄧國斌啱啱坐正嘅審計署敢唔敢問佢攞條數嚟睇。如果一切順利，農曆年前應該入得伙，大家新年可以去財政司司長府邸同唐唐拜年，𢭃番封大利是，睇吓可唔可以揩到少少唐唐嘅好運氣。
傳真︰2623-9278
電郵︰