老董降大任於煲呔曾，委任佢領導梁愛詩以及林瑞麟，成立一個「專責小組」去研究政制改革，既要上京交流，又要向港人諮詢，真係大單嘢。
不過，中央出到胡錦濤壓頂，你叫港人點信你，於是煲呔出一招「真情告白」，話佢同詩姐以及林D9飲嘅係香港水，流嘅係香港血，會按「良知」同《基本法》辦事，叫人放心，佢哋唔會出賣六百萬港人。
咁肉麻嘅對白，只有煲呔先講得出，但係八方就有好大疑惑，第一，佢句說話好似爆肚講嘅，林D9唔知認唔認帳，而詩姐有土共底，一定會聲明自己係中國人，唔係香港人。其次，煲呔唔知係咪一時口快快，忘記香港人飲緊嘅係東江水；重有最大問題係佢發明咗「香港血」呢個新名詞，啲民主派搞咁耐運動，都唔敢講個血字，怕中方驚香港搞革命，煲呔咁講點算？
重有，邊有香港血啫，我哋大家都係中國人，流中國血，八方諗咗好耐，都唔知點幫佢兜番，總之祝佢好運啦。
傳真︰2623-9278
電郵︰