Twins是今年頒獎禮的大贏家，橫掃各大電台，勇奪多項大獎。最犀利是奪得全國最受歡迎組合大獎，以從未出過國語大碟之身奪得此殊榮，紅即係紅，無話可說。
Twins大概是全港同年齡少女中最勤力的兩位，絕對係二十四小時當四十八小時用，青春無價，捱極都唔見黑眼圈兼大眼袋，鏡頭前活力經常保持充沛，大小活動中，總見兩妹蹦蹦跳，從未吝嗇體力與笑容，在香港最需要活力與笑聲的當兒，Twins傾盡全力，難怪被全港市民視為吉祥物。
剛看完Twins的「04好玩演唱會」，場內觀眾由幾歲到幾十歲，有啲可能啱啱識講爸爸媽媽，有啲就經已做咗婆婆嫲嫲，各自扯破喉嚨大喊：「阿Sa加油！阿嬌加油！」演唱會恍如莫斯科馬戲團，又變魔術、又吊威吔、又大唱大跳兒歌利又剩，小朋友睇得心花怒放，大人們亦樂得陪小朋友一起開心，反正阿Sa阿嬌都好靚女。
不知道阿Sa阿嬌還可以發多少光多少熱？個人認為阿嬌其實好叻做戲，只不過未開正戲路；阿Sa在電影上已穩佔一席位，但歌唱方面尚有大量空間可進步，正如當年林憶蓮出道時，大概沒有甚麼人認為她是唱得之人，最終她以歌聲感動無數人。
阿Sa在頒獎時梨花帶雨地說：「今年真係做咗好多嘢，一定要做咁多嘢先可以keep住人氣，如果冇人氣就做唔到想做嘅嘢。」兩位年紀輕輕的美少女，表面上弱不禁風，實際上藏着鋼鐵一樣的鬥志，別說年輕人，我這等中坑也需好好學習。