精明消費：<br>星級品牌三折變身貴價女人

放工經過海運同海港城，全白色非常Minimalism的店舖裝修好有品味，再看看櫥窗公仔身上那件大褸，不禁被吸引入內，攞起大褸價錢牌一看，知道除了每天放工過來望梅止渴之外，別無他法。04年新氣象，齋WindowShopping實在苦了大家，今次開倉，集合了多個甚受女星歡迎的名牌靚衫如AtsuroTayama、A/T、Anteprima等，三折後減了一位數字，大家終於可以買到心頭好喇！

記者：張銘恩　攝影：蔡鴻雯
模特兒：Joyce（Sha-La）

長至腳眼的晨褸款束腰大褸，有絨布及羊毛布不規則拼貼作點綴，大花內裡極度搶眼，一般大眾睇見原價好難會慷慨解囊。3折後終可一償心願，不過留意冇番模特兒咁上下高度都可能會拖地。

AtsuroTayama中世紀燈籠袖束腰白恤衫，前領位及腰後均有蝴蝶綁結，而且後有可拆式兜帽，有古典味得嚟又幾摩登！

AtsuroTayama較斯文的黑色繡花企領針織上衣，可束腰或鬆身兩種着法，而束腰着就特別有女人味。

漸變色釘珠小喇叭牛仔褲，除褲管有釘珠花外，後褲袋亦有波浪A字形黃色釘珠，夠晒精緻花巧。

除了大頭得意妹最為人知，HeroicRendezvous的優質質料亦是品牌出名之處。用了招牌粉筆畫做印花的衞衣，絕對較不少只着重印花款的本地作耐着。

一係就印住大大個得意妹公仔頭，一係就低調到牌子都唔多覺眼。屬後者的杏色棉質薄身中褸，只有細細個繡花在左襟，清清地襯大花或淨色衫都掂。

男裝PearlyGates菱格羊毛上衣，質地軟身舒服，送畀身邊Golf友做新年禮物夠晒實用。

女裝格仔斜紋褲，褲腳有反摺設計冇咁單調，唔打Golf時用嚟平日襯衫着出街都得。

唔想太侷促呆板，就一定要睇睇A/T聞名的不規則剪裁設計，加件V領針織繡花Top，去街返工一Take過搞掂。

雖然仍是冬天，不過這個冬天並不太冷，不妨趁平買定啲春裝，熱起上嚟背心可以立即上場！滑浪印花索繩背心配四個骨洗水牛，再襯埋一個豬仔印花袋，活力無限。