港股噚日升破13100後，就開始借勢回吐，恒指收報13036，升30點。國企指數更借中國鋁業（2600）配股抽水消息而回軟，跌208點，收報5182。
其實中鋁配售價僅折讓8%，唔算好誇張，而且反應理想，獲得40倍超購，需要加碼配售多1億股，令集資金額增至約31億元，所以市場未必真係驚國企配股抽水潮。國企指數主要是受中石化（386）及中石油（857）拖累下跌，兩大重磅股皆跌逾6%。正如阿虎所言，國壽（2628）加入大摩指數後，兩隻石油股所佔比重自然會調低，被芬佬減持在所難免。
近年大型集資活動咁多，正係投資銀行賺大錢機會，當然唔會咁易畀個市散，據聞唔少大行坐埋唔少貨，目的就係為咗穩住大市，為新股上市營造氣氛。之前美資在13.70元坐到成手都係嘅中銀香港（2388），現時股價雖企在15元，但據聞大戶仍未出貨獲利，今次里昂幫中鋁配股，據聞又係有友好人士支持，街外人想攞多些少貨都唔容易。如果閣下諗住沽空中鋁，提防隨時會被夾到一頸血。
黑客更加提醒阿虎，中銀香港可能再開車，事關佢阿媽中國銀行獲阿公注資，上市快將成事，個仔冇理由一啲動靜都冇，淨係賀阿媽上市都應該升十格八格啦。但阿虎一直認為，如果中行獨立上市，可能會令資金轉移至中行身上，不利中銀香港。黑客欲言又止，話現時未知中行如上市，照計阿媽唔會迫死個仔。
阿 虎