豪宅熱潮停不了,市場再錄得巨額豪宅成交。
中信香港喺壽臣山嘅南源,噚日由美記促成五十九號董事屋交易,成交價七千萬,五千幾呎,呎價接近一萬三千蚊,同喺舊年成交,由已故名設計師莊聖民設計嘅示範屋,呎價一萬三千二百蚊差唔多。
市場傳出買家係城市電訊嘅王維基,但佢噚日傍晚時分已否認牽涉呢宗交易。南源由舊年七月開賣,已經賣咗六間屋,間間銀碼都咁大,豪宅果然受市場追捧。
南源重有一間董事屋未賣出,連裝修家具,開價七千五百萬蚊。
另外,市傳著名樓市分析員林奮強早排買完尖沙嘴擎天半島後,噚日又用六百六十萬買咗同樣係九龍站上蓋嘅漾日居,聽聞個單位係銀主盤,係第六座中層A室。
話說恒基當勞張聖誕節前派咗本「野外戰地遺迹」嘅遠足書畀記者,話要帶大家去行勻書裏面嘅二次大戰遺址。佢果然言出必行,噚日藉要頒獎畀代理為由,帶埋蘭西一眾記者同一班代理阿頭,例如施永青、張錦成、胡日發同何紹章等一齊行去港島山頂松林炮台。
當勞知大家運動完一定肚餓,所以一早叫定到會擺喺炮台遺址,等大家一面享受吓久違嘅野餐之樂,又可即時補充體力。
不過,有部份記者同代理原來唔知要行山,着得好四正,所以行起上嚟幾辛苦。好彩冇女記者着斗零踭嚟,否則都唔知點算。
搞電影係裕泰興羅守耀嘅最大興趣,入股杜琪峰嘅電影公司銀河映像之後,連賣樓都不忘幫公司宣傳。噚日佢哋嘅長旺雅苑開記者會,除咗派樓書之外,重送咗兩款月曆畀傳媒,全部都係銀河製作嘅電影劇照。蘭西記得,上次物業開記者會,羅先生已經送咗銀河映像嘅宣傳海報,夠晒全情投入。
月曆所揀嘅劇照,都係杜琪峰嘅電影,例如瘦身男女、暗花、鎗火同鍾無豔等,月曆重有多位主角簽名。最令人緬懷嘅係鍾無豔嘅劇照,有剛去世嘅巨星梅艷芳嘅造型照,男裝扮相維肖維妙,真係好有紀念價值。
新一年剛開始,利嘉閣地產邀得生力軍加盟。中原地產屯門高級營業經理胡文妮(洋名May),剛剛過檔利嘉閣,噚日上任,掌管荃青及葵涌區。
利嘉閣執行董事廖偉強話,集團會投放多啲資源發展新界西北區,嚟緊又有荃灣朗逸峰二期同馬灣珀麗灣二期,計劃增至一百人。分行方面,會再開多四五間。
蘭西
電郵地址: